کچھ تصاویر ایسی ہوتی ہیں جو وقت کے دائرے سے آزاد ہو جاتی ہیں۔ سوشل میڈیا پر حال ہی میں چند نایاب تصویریں گردش کر رہی ہیں جن میں ایک خوش لباس، پرکشش نوجوان اپنی دلکش مسکراہٹ کے ساتھ نظر آ رہا ہے۔ تصویروں میں شادی کا ماحول ہے، روایتی لباس میں ملبوس دلہا اپنی بے ساختہ مسکراہٹ اور پُراعتماد انداز سے سب کی توجہ سمیٹ رہا ہے۔
یہ دلہا کوئی اور نہیں بلکہ پاکستان کے لیجنڈری ادیب، مزاح نگار اور ڈرامہ نگار انور مقصود ہیں اور یہ تصاویر ان کے جوانی کے دنوں کی ہیں۔
انور مقصود کی ان نایاب پرانی تصویروں نے انٹرنیٹ پر دھوم مچا دی ہے۔ لوگ نہ صرف ان کے اسٹائل اور شخصی وقار کی تعریف کر رہے ہیں بلکہ حیران بھی ہیں کہ ان کی جوانی میں وہ کتنے دلکش اور وجیہہ نظر آتے تھے۔ ان کے مداحوں کے لیے یہ تصاویر کسی خزانے سے کم نہیں، کیونکہ انہوں نے ہمیشہ انور مقصود کو دانشورانہ انداز میں دیکھا، مگر یہ تصاویر ان کی ایک بالکل مختلف، خوش مزاج اور دلکش پہلو کو سامنے لاتی ہیں۔
انور مقصود پاکستان کے ان چند ناموں میں سے ہیں جنہوں نے ادب، مزاح، مصوری اور فہم و ادراک کے امتزاج سے اپنی الگ پہچان بنائی۔ وہ 7 ستمبر 1939 کو حیدرآباد دکن میں پیدا ہوئے اور بعد ازاں قیامِ پاکستان کے بعد اپنے خاندان کے ساتھ کراچی منتقل ہوئے۔ انور مقصود نے نہ صرف بطور ڈرامہ نگار، بلکہ بطور شاعر، مصور اور میزبان بھی بے پناہ مقبولیت حاصل کی۔ ان کے تحریر کردہ ڈرامے جیسے “آنگن ٹیڑھا”، “سٹنگر”، “تَلخیاں” اور “شوشا” آج بھی پاکستانی ٹیلی وژن کی تاریخ میں کلاسک کا درجہ رکھتے ہیں۔ انور مقصود نے اپنے منفرد اندازِ گفتگو اور باریک مزاح کے ذریعے معاشرتی تضادات کو اس نرمی سے بیان کیا کہ قاری یا ناظر کو تلخی کے بجائے مسکراہٹ کے ساتھ سوچنے پر مجبور کر دیا۔
شادی کی تصویر دیکھ کر سوشل میڈیا صارفین نے ان کے بالوں کے رنگ پر بھی دلچسپ تبصرے کیے۔ نئی نسل کے بہت سے لوگوں کا کہنا ہے کہ انھوں نے انور مقصود کو پہلی بار سیاہ بالوں میں دیکھا ہے اس لئے وہ پہچان نہ سکے۔ بلاشبہ انور مقصود کے بال ان کی شخصیت میں وقار اور اضافے کا باعث ہیں۔
یوں انور مقصود ایک بار پھر خبروں میں آ گئے مگر اس بار ان کی تحریروں یا جملوں کی وجہ سے نہیں بلکہ اپنی جوانی کے اسٹائل اور یادگار انداز سے، جو وقت گزرنے کے باوجود آج بھی تازہ اور اثر انگیز لگتا ہے۔