حکومت سندھ نے شہری سیکیورٹی اور عوامی ٹرانسپورٹ کو جدید خطوط پر استوار کرنے کے لیے اہم قدم اٹھاتے ہوئے پیپلز بس سروس اور ای وی ٹیکسی سروس کے ان ڈور و آؤٹ ڈور کیمروں کو سیف سٹی نیٹ ورک سے منسلک کرنے کا فیصلہ کیا ہے۔
وزیر اطلاعات و ٹرانسپورٹ شرجیل انعام میمن نے کہا کہ پیپلز بس سروس اور ای وی ٹیکسی سروس میں نصب انٹیلی جنٹ ٹرانسپورٹ سسٹم کو سیف سٹی پروجیکٹ سے جوڑنے کا مقصد عوامی ٹرانسپورٹ کو محفوظ بنانا اور شہری علاقوں میں سیکیورٹی مانیٹرنگ کو مزید مؤثر بنانا ہے۔
انہوں نے بتایا کہ کیمروں کے انضمام کے بعد کراچی سمیت صوبے کے بڑے شہروں میں ٹریفک مینجمنٹ، عوامی تحفظ اور سیکیورٹی نگرانی کے نظام میں نمایاں بہتری آئے گی۔
شرجیل انعام میمن نے کہا کہ حکومت سندھ دسمبر میں جدید ای وی ٹیکسی سروس کے آغاز کے لیے بھرپور اقدامات کر رہی ہے۔ یہ سروس شہریوں کو سستی، آرام دہ اور ماحول دوست سفری سہولت فراہم کرے گی۔
کراچی میں سرمایہ کاروں کے ایک وفد سے ملاقات کے دوران وزیر ٹرانسپورٹ نے بتایا کہ ای وی ٹیکسی سروس ابتدائی طور پر کراچی میں شروع کی جائے گی اور بعد ازاں دیگر بڑے شہروں تک توسیع دی جائے گی۔
انہوں نے کہا کہ خواتین کے لیے پنک ای وی ٹیکسی سروس بھی متعارف کرائی جا رہی ہے تاکہ خواتین کو محفوظ اور آرام دہ سفر فراہم کیا جا سکے۔
وفد میں سیکریٹری ٹرانسپورٹ اسد ضامن، سندھ ماس ٹرانزٹ اتھارٹی کی منیجنگ ڈائریکٹر کنول نظام بھٹو سمیت دیگر حکام شریک تھے جبکہ نجی سرمایہ کاروں نے چارجنگ اسٹیشنز، آپریشنل ماڈلز اور ٹرانسپورٹ ڈھانچے سے متعلق تجاویز پیش کیں۔
شرجیل انعام میمن نے کہا کہ ای وی ٹیکسی منصوبہ نہ صرف عوامی سہولت بلکہ صوبے کی معاشی ترقی کے لیے بھی سنگ میل ثابت ہوگا۔انہوں نے کہا کہ حکومت سندھ پائیدار ٹرانسپورٹ اور ماحولیاتی بہتری کے لیے نجی شعبے کے ساتھ شراکت داری کو کلیدی اہمیت دیتی ہے۔