افغان مہاجرین کی اپنے وطن واپسی کا سلسلہ جاری ہے طورخم بارڈر ساتویں روز بھی کھلا رہا۔
سرحدی حکام کے مطابق چھ نومبر کو 3 ہزار 863 افغان شہری، جن میں مرد، خواتین اور بچے شامل تھے، نادرا امیگریشن سینٹر میں اندراج کے بعد افغانستان واپس روانہ ہوئے۔
اعداد و شمار کے مطابق گزشتہ چھ دنوں میں مجموعی طور پر 32 ہزار 989 افغان مہاجرین پاکستان سے اپنے وطن واپس جا چکے ہیں جن میں بزرگوں اور کم عمر بچوں کی بھی بڑی تعداد شامل ہے۔
ذرائع کا کہنا ہے کہ مہاجرین پیدل اور گاڑیوں کے ذریعے سرحد عبور کر رہے ہیں، جبکہ واپسی کا عمل روزانہ صبح سے رات گئے تک بلا تعطل جاری رہتا ہے۔
دوسری جانب طورخم بارڈر عام آمدورفت اور تجارتی سرگرمیوں کے لیے بدستور بند ہے تاہم انسانی بنیادوں پر افغان شہریوں کی واپسی کا سلسلہ جاری رکھا گیا ہے۔