قومی کرکٹ ٹیم کے فاسٹ بولر نسیم شاہ کے حجرے پر نامعلوم افراد کی جانب سے فائرنگ کا واقعہ پیش آیا ہے۔ پولیس کے مطابق واقعہ تھانہ معیار کی حدود حاجی آباد میں پیش آیا جہاں مسلح افراد نے گزشتہ رات نسیم شاہ کے گھر پر فائرنگ کی اور موقع سے فرار ہوگئے۔
پولیس کا کہنا ہے کہ فائرنگ کے نتیجے میں حجرے کا مین گیٹ، کھڑکیاں اور ایک گاڑی جزوی طور پر متاثر ہوئیں، تاہم کوئی جانی نقصان نہیں ہوا۔ واقعے کے بعد پولیس جائے وقوع پر پہنچی، علاقے کو گھیرے میں لے کر ابتدائی شواہد اکٹھے کیے گئے اور قریبی گھروں کی سی سی ٹی وی فوٹیج کا بھی جائزہ لیا جا رہا ہے۔
پولیس نے نسیم شاہ کے والد کی مدعیت میں نامعلوم ملزمان کے خلاف مقدمہ درج کر لیا ہے۔ نسیم شاہ کے والد نے اپنے بیان میں کہا کہ ان کی کسی سے کوئی دشمنی یا تنازع نہیں۔
پولیس حکام کے مطابق واقعہ دہشت گردی کا نہیں بلکہ ممکنہ طور پر اراضی تنازع یا مقامی عناد کا نتیجہ ہو سکتا ہے۔ واقعے کے بعد پانچ مشتبہ افراد کو حراست میں لیا گیا ہے اور مزید تفتیش جاری ہے۔
ڈی پی او لوئر دیر نے نسیم شاہ کے والد سے ملاقات میں یقین دہانی کرائی ہے کہ واقعے میں ملوث عناصر کو جلد گرفتار کر کے قانون کے کٹہرے میں لایا جائے گا۔
پولیس نے علاقے میں سیکیورٹی مزید سخت کر دی ہے۔ واقعے کے وقت فاسٹ بولر نسیم شاہ گھر پر موجود نہیں تھے۔