فیڈرل بورڈ آف ریونیو نے اعلان کیا ہے کہ اب مینول انکم ٹیکس ریٹرن قبول نہیں کیے جائیں گے اور تمام افراد کے لیے انکم ٹیکس ریٹرن اور ودہولڈنگ اسٹیٹمنٹس صرف الیکٹرانک طریقے سے جمع کرانا لازمی ہوگا۔
یہ ہدایت ایس آر او 2107 آف 2025 کے ذریعے پیر کے روز جاری کی گئی۔ ایف بی آر نے اس ترمیم کا مسودہ گزشتہ ہفتے اسٹیک ہولڈرز سے رائے لینے کے لیے جاری کیا تھا تاکہ حتمی منظوری سے قبل ان کی تجاویز حاصل کی جا سکیں۔
یہ ترمیم انکم ٹیکس رولز 2002 کے رول 73 کے تحت متعارف کرائی گئی ہے جس میں نیا ذیلی قاعدہ (2DD) شامل کیا گیا ہے جو افراد کو پابند کرتا ہے کہ وہ اپنے ریٹرن اور ودہولڈنگ اسٹیٹمنٹس صرف الیکٹرانک ذرائع سے جمع کرائیں۔
نوٹیفکیشن کے مطابق یہ اقدام شفافیت میں اضافہ، ٹیکس کے ضوابط کی بہتر پاسداری اور پورے ملک میں ٹیکس فائلنگ کے عمل کو آسان اور مؤثر بنانے کے لیے کیا گیا ہے۔