وزیر تجارت جام کمال خان کی سربراہی میں ملائیشیا گوشت برآمدات کمیٹی کا اجلاس ہوا جس میں وفاقی وزیر غذائی تحفظ رانا تنویر حسین اور معاون خصوصی ہارون اختر خان نے بھی شرکت کی۔ اجلاس میں ملائیشیا کو گوشت برآمدات کی حکمت عملی، لاگت، مسابقت، اور سپلائی چین کے مسائل پر تفصیلی بحث کی گئی۔
وزیر تجارت جام کمال خان نے کہا کہ مسابقت برقرار رکھنے کے لیے بھارت سے گوشت کی قیمتوں کا موازنہ کیا جائے۔ وفاقی وزیر رانا تنویر حسین نے فارم سے سلاٹر ہاؤس تک معیار اور وزن کے معیار کو یقینی بنانے پر زور دیا اور 14 سے 18 ماہ عمر کی بھینسیں برآمد کے لیے منتخب کرنے کی ہدایت دی۔ معاون خصوصی ہارون اختر خان نے کہا کہ گوشت کی برآمدات میں نجی شعبے کی شمولیت بھی ضروری ہے۔
کمیٹی نے گوشت کی برآمدات کا ہدف 20 کروڑ ڈالر مقرر کرتے ہوئے ورکنگ گروپ سے ایک ہفتے میں حتمی رپورٹ طلب کر لی ہے تاکہ برآمدات کو تیز اور مؤثر انداز میں فروغ دیا جا سکے۔