وزیرِاعلیٰ بلوچستان میر سرفراز بگٹی کی زیر صدارت صوبائی اپیکس کمیٹی کا 20 واں اجلاس منعقد ہوا، جس میں کور کمانڈر بلوچستان لیفٹیننٹ جنرل راحت نسیم احمد خان سمیت اعلیٰ عسکری و سول حکام نے شرکت کی۔
اجلاس میں صوبے کی مجموعی سیکیورٹی صورتحال، ترقیاتی منصوبوں کی پیش رفت اور مفادِ عامہ کے مختلف امور پر تفصیلی غور و خوض کیا گیا۔
اجلاس میں گزشتہ اپیکس کمیٹی کے فیصلوں کی پیش رفت کا تفصیلی جائزہ لیا گیا اور ان کی توثیق کی گئی۔ کمیٹی نے بھتہ خوری، سونے کی اسمگلنگ، حوالہ و ہنڈی اور منی لانڈرنگ میں ملوث عناصر کے خلاف سخت کریک ڈاؤن کا فیصلہ کیا۔
اپیکس کمیٹی نے ایف آئی اے بلوچستان کی کارکردگی پر عدم اطمینان کا اظہار کرتے ہوئے وائٹ کالر کرائم، بھتہ خوری اور مالی بدعنوانیوں کے خلاف مؤثر کارروائی کی ہدایت دی۔ اجلاس میں ریاست مخالف اور منافرت پر مبنی اشاعتی مواد پر پابندی کا فیصلہ بھی کیا گیا۔
مزید برآں، کمیٹی نے فیصلہ کیا کہ ایم بی بی ایس کرنے والے ڈاکٹرز تین سال تک اپنے مقامی اضلاع میں خدمات سرانجام دینے کے پابند ہوں گے تاکہ دیہی علاقوں میں صحت کی سہولیات کو بہتر بنایا جا سکے۔
اجلاس میں پوست کی کاشت اور لین دین میں ملوث افراد کے خلاف سخت کارروائی کی منظوری دی گئی اور فیصلہ کیا گیا کہ ایسے عناصر کے نام فورتھ شیڈول میں شامل کیے جائیں گے۔
بلوچستان اسپیشل ڈیولپمنٹ انیشییٹیوز (BSDI) کے تحت مکمل شدہ منصوبوں پر اطمینان کا اظہار کیا گیا جبکہ زیر تکمیل منصوبوں کو جلد از جلد مکمل کرنے کی ہدایت دی گئی۔
کوئٹہ میں گیس پریشر کی کمی کے مسئلے پر بھی غور کیا گیا، جس پر وزیر اعلیٰ بلوچستان نے سوئی سدرن گیس کمپنی کے جنرل منیجر کو عوامی شکایات کے فوری ازالے کی ہدایت کی۔
وزیرِاعلیٰ میر سرفراز بگٹی نے اجلاس سے خطاب میں کہا کہ بلوچستان میں امن و استحکام کے لیے اقدامات کو نتیجہ خیز بنایا جا رہا ہے۔ بھتہ خوروں، سونے کی اسمگلنگ، منی لانڈرنگ اور وائٹ کالر کرائم کے خلاف کارروائیاں مزید تیز کی جائیں۔ ریاست مخالف اور منافرت انگیز مواد ناقابلِ برداشت ہے۔
انہوں نے کہا کہ بلوچستان اسپیشل ڈویلپمنٹ انیشییٹیوز کے تحت عوام کو بنیادی سہولتیں فراہم کی جا رہی ہیں، جبکہ دیہی علاقوں میں بہتر طبی خدمات کے لیے ڈاکٹرز کو اپنے اضلاع میں خدمات انجام دینا ہوں گی۔
وزیرِاعلیٰ نے مزید کہا کہ کوئٹہ میں گیس پریشر کی کمی کے باعث عوام مشکلات کا شکار ہیں، متعلقہ حکام عوامی شکایات کا فوری ازالہ یقینی بنائیں۔