ملک میں پیٹرولیم مصنوعات کی قیمتوں میں اضافے کا امکان ظاہر کیا جا رہا ہے۔
مارکیٹ ذرائع کے مطابق پیٹرولیم انڈسٹری نے 16 نومبر سے ہائی اسپیڈ ڈیزل کی فی لیٹر قیمت میں 9 روپے 60 پیسے اضافہ کرنے کی تجویز دی ہے، جبکہ پیٹرول کی فی لیٹر قیمت میں 1 روپے 96 پیسے کمی کا امکان ہے۔
ذرائع کا کہنا ہے کہ مٹی کے تیل کی فی لیٹر قیمت میں 8 روپے 82 پیسے اور لائٹ ڈیزل آئل کی قیمت میں 7 روپے 15 پیسے اضافے کا امکان ہے۔
تجویز کے مطابق 16 نومبر سے پیٹرول کی نئی ممکنہ قیمت 263 روپے 49 پیسے فی لیٹر اور ہائی اسپیڈ ڈیزل کی قیمت 288 روپے 4 پیسے فی لیٹر تک پہنچ سکتی ہے۔
اوگرا کی جانب سے نئی سمری ہفتے کے روز وفاقی حکومت کو بھجوائی جائے گی، جبکہ وزیر اعظم کی منظوری کے بعد وزارتِ خزانہ پیٹرولیم مصنوعات کی نئی قیمتوں کا نوٹیفکیشن جاری کرے گی۔