بلوچستان کے ضلع کچھی کے علاقے مچ کے نزدیک سوئی سدرن گیس کمپنی کی 18 انچ کی ٹرانسمیشن لائن علی الصبح 5 بجے پھٹ گئی جس کے نتیجے میں کوئٹہ سمیت صوبے کے مختلف علاقوں میں گیس کی فراہمی مکمل طور پر معطل ہوگئی۔
گیس بندش کے باعث شہریوں کو کھانے پکانے، گھریلو استعمال اور کاروباری سرگرمیوں میں شدید مشکلات کا سامنا ہے۔ سرد موسم کے باعث گیس کی عدم دستیابی نے عوام کی پریشانی مزید بڑھا دی ہے۔
سوئی سدرن حکام کے مطابق ابھی یہ واضح نہیں ہوسکا کہ پائپ لائن پریشر بڑھنے کی وجہ سے پھٹی یا واقعہ تخریب کاری کا نتیجہ ہے۔ واقعے کی وجوہات جاننے کے لیے تحقیقات شروع کر دی گئی ہیں جبکہ مرمت کے لیے ٹیمیں جائے وقوعہ پر روانہ کر دی گئی ہیں۔گیس بحالی میں وقت لگنے کا امکان ظاہر کیا جا رہا ہے۔