بھارتی ٹیسٹ ٹیم کے کپتان شبمن گل میچ کے دوران انجری کا شکار ہوگئے جنہیں اسپتال میں داخل کروا دیا گیا ہے۔
جنوبی افریقا کے خلاف جاری پہلے ٹیسٹ میچ میں بھارت کو اس وقت بڑا دھچکا لگا جب کپتان شبمن گل گردن کی انجری کا شکار ہوگئے، انجری کے باعث شبمن گل ممکنہ طور پر باقی میچ سے باہر ہوسکتے ہیں۔
بھارتی میڈیا کے مطابق کولکتہ کے ایڈن گارڈنز میں کھیلے جا رہے میچ کے دوسرے روز شبمن گل صرف 4 رنز بنا کر میدان سے چلے گئے اور انہیں اسپتال منتقل کیا گیا۔
شبمن گل کو یہ انجری اسپنر سائمن ہارمر کی گیند پر سویپ شاٹ کھیلنے کے دوران آئی اور ان کی گردن میں شدید کھچاؤ پیدا ہوا، ڈریسنگ روم میں انہیں ابتدائی طبی امداد کے دوران کالر پہنایا گیا۔ بعد ازاں ہفتے کی شام سروائیکل کالر میں انہیں اسپتال جاتے دیکھا گیا۔
واضح رہے کہ شبمن گل اس وقت آئی سی یو میں داخل ہیں، انجری کی شدت جاننے کے لیے مزید ٹیسٹ کیے جائیں گے جس کے بعد مزید علاج اور کی باقی میچز میں دستیابی سے متعلق فیصلہ کیا جائے گا۔