شہرِ قائد میں آئندہ ہفتے سے سردی کی شدت میں واضح اضافہ متوقع ہے اور درجہ حرارت سنگل ڈیجیٹ میں ریکارڈ ہونے کا امکان ظاہر کیا جا رہا ہے۔ اس وقت شہر میں ہلکی سردی کے ساتھ موسم خشک ہے۔
محکمۂ موسمیات کے مطابق دن کے اوقات میں موسم خشک رہے گا جبکہ رات کے وقت خنکی بڑھنے اور علی الصبح ہلکی دھند پڑنے کا امکان ہے۔ شہر کا موجودہ درجہ حرارت 12 ڈگری سینٹی گریڈ ریکارڈ کیا گیا ہے۔
ہوا میں نمی کا تناسب 57 فیصد ہے جب کہ شمال مشرق سے 7 کلومیٹر فی گھنٹہ کی رفتار سے ہوائیں چل رہی ہیں۔ آج زیادہ سے زیادہ درجہ حرارت 30 سے 32 ڈگری سینٹی گریڈ تک بڑھ سکتا ہے۔
دوسری جانب شہر کا فضائی معیار مسلسل خراب ہے۔ عالمی رینکنگ کے مطابق کراچی آلودہ ترین شہروں میں آٹھویں نمبر پر موجود ہے جبکہ ہوا میں آلودہ ذرات کی مقدار 170 پرٹیکیولیٹ میٹرز ریکارڈ کی گئی ہے جو صحت کے لیے خطرناک حد کے قریب ہے۔
طبی ماہرین نے شہریوں کو احتیاط برتنے کی ہدایت کرتے ہوئے کہا ہے کہ گھروں سے باہر نکلتے وقت ماسک کا استعمال کریں اور غیر ضروری طور پر باہر رہنے سے گریز کریں۔