کراچی میں کل سے کرکٹ کا میلہ سجنے والا ہے۔ پاکستان ویٹرنز کرکٹ ایسوسی ایشن 40 سال سے زیادہ عمر والے کھلاڑیوں کے ورلڈ کپ کی میزبانی کرے گا۔
آج ایک تقریب میں PVCA کے چیئرمین فواد اعجاز نے ٹورنامنٹ کا باقاعدہ آغاز کردیا۔ انہوں نے بتایا کہ ٹورنامنٹ کے میچز شہر میں چار گراؤنڈز پر منعقد کیے جائیں گے جس میں نیشنل بینک آف پاکستان اسپورٹس کمپلیکس، معین خان اکیڈمی، ساؤتھ اینڈ کلب اور کراچی جیمخانہ شامل ہے، جبکہ سیمی فائنل اور فائنل نیشنل اسٹیڈیم میں کھیلے جائیں گے۔
ٹورنامنٹ میں پاکستان، ویسٹ انڈیز، سری لنکا، ساؤتھ افریقہ، زمبابوے، یو ایس اے، کینیڈا، ہانگ کانگ، یو اے ای اور ریسٹ آف دی ورلڈ 11 شامل ہے۔
پاکستان کی قیادت سابق آل راؤنڈر عبدالرزاق کریں گے۔ فواد اعجاز نے بتایا کہ بھارت کو بھی ٹیم بھیجنے کی دعوت دی گئی تھی لیکن انہوں نے انکار کر دیا اور اگلے سال جو 40 پلس کا ورلڈ کپ بھارت میں ہونا تھا اب گیانا میں کھیلا جائے گا۔