مسلم لیگ (ن) کے رہنما اور وزیراعظم کے کوآرڈینیٹر برائے خیبر پختونخوا اختیار ولی نے الزام عائد کیا ہے کہ وزیراعلیٰ خیبر پختونخوا سہیل آفریدی کے علاقے میں منشیات کے کارخانے ہیں۔
اپنے ویڈیو بیان میں وزیراعظم کے کوآرڈینیٹر اختیار ولی کا کہنا تھا کہ پی ٹی آئی کے لوگ منشیات کے دھندے میں ملوث ہیں۔ اختیار ولی نے کہا کہ وادی تیراہ میں منشیات کے کارخانے لگے ہیں جہاں سے منشیات پورے ملک میں اسمگل ہوتی ہے۔
انہوں نے کہا کہ وزیراعلیٰ خیبر پختونخوا سہیل آفریدی نے خیبر میں منشیات کی تردید کرکے حقائق کی نفی کی۔ اختیار ولی کا کہنا تھا کہ وزیراعلیٰ خیبر پختونخوا کا تعلق ضلع خیبر سے ہے، وزیراعلیٰ سے مطالبہ کیا تھا کہ ضلع خیبر میں منشیات کے خلاف کارروائی کریں، جس وزیراعلیٰ کے حلقے میں منشیات تیار ہو اسے استعفیٰ دے دینا چاہیے۔
وزیر اعظم کے کوآرڈینیٹر نے کہا کہ منشیات کے دھندے میں پی ٹی آئی کے لوگ ملوث ہیں، منشیات کا پیسہ سرحد پار بھی جاتا ہے اور یہی پیسہ دہشت گردی کے لیے اور ریاست کے خلاف بھی استعمال ہوتا ہے۔