بلوچستان کے ضلع خضدار کے علاقے وڈھ میں ایک اور نوجوان کے اغوا کے بعد قومی شاہراہ کو ایک بار پھر احتجاجاً بند کردیا گیا ہے۔
اطلاعات کے مطابق خضدار تحصیل وڈھ کے کلی براہمزئی سے تعلق رکھنے والے نوجوان غلام سرور ولد اسد اللہ براہمزئی مینگل کو کاکاہیر کے علاقے سے اغوا کرکے نامعلوم مقام پر منتقل کردیا گیا ہے۔
واقعے کے خلاف اغوا شدہ نوجوان کے اہلِ خانہ اور علاقہ مکینوں نے کلی براہمزئی کے مقام پر قومی شاہراہ کو احتجاجاً بند کر دیا، جس کے باعث ٹریفک معطل ہو گئی۔
گزشتہ روز (ہفتے کے دن) بھی وڈھ سے عبدالباری ولد عبدالخالق نامی شخص کو لاپتہ کیا گیا تھا، جس کے خلاف قومی شاہراہ پر دھرنا دیا گیا تھا، تاہم انتظامیہ کے ساتھ مذاکرات کے بعد آج صبح احتجاج ختم کر دیا گیا تھا۔
تاہم نوجوان کے تازہ اغوا کے واقعے کے بعد ایک بار پھر احتجاج شروع کردیا گیا ہے۔