راولپنڈی کرکٹ سٹیڈیم میں کھیلے گئے میچ میں زمبابوے کی پوری ٹیم پاکستان کے 196 رنز کے ہدف کے تعاقب میں 126 رنز پر آؤٹ ہو گئی۔ یاد رہے کہ گس سیریز میں پاکستان اب تکزمبابوے کو دو جبکہ سری لنکا کو ایک میچ میں شکست دے چکا ہے
پاکستان نے راولپنڈی میں جاری سہ فریقی سیریز کے چوتھے ٹی ٹوئنٹی میچ میں عثمان طارق کی عمدہ بولنگ کی بدولت زمبابوے کو 69 رنز سے شکستدے کر فائنل میں جگہ بنا لی ہے۔
راولپنڈی کرکٹ سٹیڈیم میں کھیلے گئے میچ میں زمبابوے کی پوری ٹیم پاکستان کی جانب سے دیے گئے 196 رنز کے ہدف کے تعاقب میں 126 رنز بنا سکی۔
زمبابوے کی جانب سے ریان بورل نے 49 گیندوں پر 67 رنز بنائے تاہم دیگر بیٹرز میں سے کوئی بھی اُن کا ساتھ نہ دے سکا۔ پاکستان کے لیے عثمان طارق نے ہیٹ ٹرک سمیت چار کھلاڑیوں کو آؤٹ کیا جبکہ محمد نواز نے دو وکٹیں حاصل کیں۔
یاد رہے کہ اس سیریز میں پاکستان اب تکزمبابوے کو دو جبکہ سری لنکا کو ایک میچ میں شکست دے چکا ہے۔
اتوار کے روز کھیلے گئے اس میچ میں پاکستان نے ٹاس جیت کر پہلے کھیلتے ہوئے زمبابوے کو جیت کے لیے 196 رنز کا ہدف دیا تھا۔
پاکستانی اننگز کی خاص بات بابر اعظم اور صاحبزادہ فرحان کی نصف سینچریاں تھیں جنھوں نے اپنی جارحانہ بلے بازی کے باعث زمبابوے کے بولرز پر دباؤ ڈالے رکھا۔
پاکستان کے کپتان سلمان علی آغا نے ٹاس جیت کر پہلے خود بیٹنگ کا فیصلہ کیا۔ پاکستان کو اُس وقت پہلا نقصان اُٹھانا پڑا، جب صائم ایوب آٹھ گیندوں پر 13 رنز بنا کر پویلین لوٹ گئے۔
صائم کے بعد بابر اعظم بیٹنگ کے لیے آئے اور صاحبزادہ فرحان کے ساتھ مل کر اُنھوں نے پاکستان کے سکور کو تیزی سے آگے بڑھایا۔
دونوں نے 15٫2 اوورز میں سکور 132 رنز پر پہنچا دیا، جب صاحبزادہ فرحان تین چھکوں اور چار چوکوں کی مدد سے 41 گیندوں پر 63 رنز بنا کر آؤٹ ہو گئے۔
بابر اعظم نے سات چوکوں اور دو چھکوں کی مدد سے 52 گیندوں پر 74 رنز بنائے۔ پاکستان کی جانب سے فخر زمان نچلے نمبر پر بیٹنگ کے لیے اُنھوں نے تین چھکوں اور ایک چوکے کی مدد سے 10 گیندوں پر 27 رنز بنائے۔
فہیم اشرف نے تین، محمد نواز نے چار جبکہ کپتان سلمان علی آغا ایک رنز بنا کر ناٹ آؤٹ رہے۔
سکندر رضا نے چار اوورز میں 39 رنز دے کر دو وکٹیں حاصل کیں۔ زمبابوے کی جانب سے بریڈ ایونز سب سے مہنگے بولر ثابت ہوئے۔ اُنھوں نے چار اوورز میں 59 رنز دے کر ایک وکٹ حاصل کی۔
پاکستان نے سہ فریقی سیریز میں اس میچ سے پہلے سری لنکا اور زمبابوے کو شکست دے کر پوائنٹس ٹیبل پر سرفہرست ہے۔ زمبابوے کی ٹیم دوسرے نمبر پر ہے جس نے سری لنکا کو شکست دی تھِی۔
سری لنکا کی ٹیم اب تک دو میچز کھیل چکی ہے اور دونوں میں اسے شکست کا سامنا کرنا پڑا تھا۔
’زبردست جیت پر پوری ٹیم کو مبارک ہو‘
پاکستان کے اس سیریز میں ناقابل شکست رہنے پر پاکستان کے سوشل میڈیا پر کرکٹ فینز بھی داد دیتے رہے۔
سمیر نامی صارف نے پوری ٹیم کو مبارکباد دیتے ہوئے لکھا کہ’بہت خوب! پاکستان نے زمبابوے کو شکست دے دی۔ عثمان طارق نے شاندار باؤلنگ کرکے مخالف بیٹسمینوں کی نیندیں اڑا دیں۔ زبردست جیت پر پوری ٹیم کو مبارک ہو!
ایکس پر صحافی کرن خان نے لکھا کہ ’پاکستان نے ٹی ٹوئنٹی ٹرائی سیریز کے فائنل میں کوالیفائی کرلیا! زمبابوے ممکنہ طور پر فائنل میں کوالیفائی کرنے کے زیادہ امکانات رکھتی ہے۔‘
دوسری جانب صحافی فیضان لاکھانی نے ایکس پر لکھا کہ ’عثمان طارق ٹی ٹوئنٹی میں لگاتار تین وکٹیں حاصل کرنے والے چوتھے پاکستانی کرکٹر بن گئے ہیں اس سے قبل یہ اعزاز فہیم اشرف، محمد حسنین اور محمد نواز کے پاس موجود ہے۔‘
فخر کے نچلے نمپر پر بھیجنے پر صارفین کی تنقید
پاکستان کی جانب سے ٹی ٹوئنٹی میچز میں عام طور پر اوپننگ کرنے والے فرحان زمان کو آٹھوِیں نمبر پر بیٹنگ پر بھیجنے پر سوشل میڈیا پر بعض صارفین تنقید کر رہے ہیں۔
عروج جاوید نامی صارف نے لکھا کہ ’فخر کے ساتھ جتنی زیادتی ہوئی، آج تک کسی اور کرکٹر کے ساتھ نہیں ہوئی۔ جب دل کیا اوپنر بھیج دیا اور جب دل کیا نچلے نمبروں پر بھیج دیتے ہیں۔ شرافت کا اتنا فائدہ نہ اُٹھاؤ۔ ‘
احمد حسیب نامی صارف نے فخر زمان کی جارحانہ بلے بازی کی تعریف کرتے ہوئے لکھا کہ ’یہ شخص زبردست ہے۔ کسی بھی نمبر پر بھیج دیں۔ یہ صرف ٹیم کے لیے کھیلتے ہیں۔‘
نعیم نامی صارف نے لکھا کہ ’جو فخر کو نچلے نمبرز پر بیٹنگ کے لیے بھیجتے ہیں۔ اُنھیں سوچنا چاہیے۔‘
ہارون نامی صارف بابر اعظم کو ماضی میں ٹی ٹوئنٹی ٹیم سے ڈراپ کرنے کے فیصلے پر تنقید کرتے ہوئے کہتے ہیں کہ ’بابر کبھی بھی ٹی ٹوئنٹی سے ڈراپ نہیں ہوتے تھے۔ اصل مسئلہ رضوان کا تھا جن کی بیٹنگ کا انداز بابر کو بھی متاثر کرتا تھا۔‘
