محکمہ موسمیات نے بلوچستان کے خشک سالی کے شکار علاقوں کے لیے بڑی خوشخبری سناتے ہوئے دسمبر میں گرج چمک کے ساتھ شدید بارشوں کی پیشگوئی کر دی ہے۔ رواں برس مغربی ہواؤں کا طاقتور سلسلہ 6 سے 10 دسمبر کے دوران بلوچستان میں داخل ہوگا جس کے بعد بارشوں کا پہلا بھرپور اور طویل مرحلہ شروع ہو جائے گا۔
محکمہ موسمیات کے مطابق بارشوں کا یہ سلسلہ وقفے وقفے سے پورے مہینے جاری رہنے کا امکان ہے۔ ژوب، شیرانی، موسیٰ خیل، بارکھان، کوہلو، سبی، لسبیلہ، آواران، کیچ، گوادر، پنجگور، خضدار، قلعہ سیف اللہ، چاغی، نوشکی، واشک اور مستونگ سمیت خشک سالی سے متاثرہ اضلاع میں نمایاں بہتری متوقع ہے۔
کئی علاقوں میں گرج چمک کے ساتھ موسلادھار بارشیں جبکہ بالائی پہاڑی مقامات پر برف باری کا بھی امکان ظاہر کیا گیا ہے۔
ماہرین کا کہنا ہے کہ اس سال شمال مغربی ہوائیں معمول سے زیادہ فعال ہیں جبکہ عرب سمندر سے نمی کا مسلسل بلوچستان کی جانب رخ بارشوں میں اضافے کا باعث بن رہا ہے۔ اس طویل سلسلے سے زیرِ زمین پانی، ڈیموں کے ذخائر اور خشک سالی کی صورت حال میں بہتری آنے کی اُمید ہے۔
ادھر محکمہ موسمیات نے بتایا کہ آج بھی ملک کے بیشتر علاقوں میں موسم سرد اور خشک رہے گا جبکہ پہاڑی مقامات پر رات اور صبح کے وقت شدید سردی برقرار رہے گی۔ پنجاب اور خیبر پختونخوا کے میدانی علاقوں میں چند مقامات پر ہلکی سے درمیانی دھند چھانے کا امکان ہے۔