سوشل میڈیا پر نازیبا مواد اپ لوڈ کرنے اور غیر قانونی جوئے کی ایپلیکیشنز کی تشہیر کے الزام میں گرفتار یوٹیوبر سعد الرحمان المعروف ڈکی بھائی کو لاہور ہائیکورٹ نے 10 لاکھ روپے کے مچلکوں کے عوض ضمانت منظور کر لی۔
لاہور ہائیکورٹ میں پیر کو سماعت ہوئی جس کی صدارت جسٹس شہرام سرور نے کی۔ دلائل سننے کے بعد عدالت نے ڈکی بھائی کی ضمانت منظور کرتے ہوئے انہیں مچلکوں کی شرط پر رہا کرنے کا حکم دیا۔
یاد رہے کہ ڈکی بھائی کے خلاف مقدمہ 17 اگست کو نیشنل کرائم ایجنسی (این سی سی آئی اے) نے درج کیا تھا۔ ان پر الزام تھا کہ انہوں نے اپنے یوٹیوب چینل کے ذریعے غیر قانونی جوئے کی ایپلیکیشنز کی تشہیر کی۔
اس مقدمے میں ڈکی بھائی کی اہلیہ اروب جتوئی کی شکایت پر سائبر کرائم ایجنسی کے 9 افسران کے خلاف بھی مقدمہ درج کیا گیا جس میں الزام ہے کہ افسران نے ڈکی بھائی کو گرفتار کرنے کے بعد ان سے کروڑوں روپے رشوت وصول کی اور ان کے اکاؤنٹس سے ڈالر اپنے اکاؤنٹس میں منتقل کیے۔