قلعہ سیف اللہ میں محکمہ جنگلات اور پولیس نے مشترکہ کارروائی کرتے ہوئے افغان اڑیال کا غیر قانونی شکار کرنے والے چار ملزمان کو گرفتار کرلیا۔
کارروائی مقامی کمیونٹی کی بروقت اطلاع پر عمل میں لائی گئی، جس کے دوران ملزمان کے قبضے سے شکار کیا ہوا نایاب جانور اور تین رائفلیں برآمد ہوئیں۔ پولیس کے مطابق گرفتار ملزمان کا تعلق لورالائی اور دکی سے ہے، جن کے خلاف بلوچستان وائلڈ لائف ایکٹ 2014 کے تحت مقدمہ درج کرلیا گیا ہے۔
محکمہ جنگلی حیات کے مطابق افغان اڑیال ایک نایاب اور مکمل طور پر محفوظ قرار دیا گیا جانور ہے، جس کی ٹرافی ہنٹنگ کی قانونی قیمت کم از کم 20 ہزار ڈالر سے شروع ہوتی ہے۔
افغان اڑیال نایاب نسل کی جنگلی بھیڑ ہے جو بلوچستان کے پہاڑی علاقوں کے علاوہ افغانستان اور وسطی ایشیائی ممالک میں پائی جاتی ہے۔ وائلڈ لائف حکام کا کہنا ہے کہ اس طرح کے غیر قانونی شکار سے نایاب نسلوں کے تحفظ کے حکومتی اقدامات کو شدید دھچکا پہنچتا ہے۔