کوئٹہ: زیارت سے ڈیڑھ ماہ قبل اغوا کیے گئے اسسٹنٹ کمشنر افضل باقی کو بیٹے سمیت قتل کر دیا گیا۔ لیویز ذرائع کے مطابق افضل باقی کی لاش ہرنائی کے علاقے زرد آلو سے برآمد کرلی گئی ہے۔
ذرائع کے مطابق اسسٹنٹ کمشنر افضل باقی کو ڈیڑھ ماہ قبل ان کے بیٹے سمیت زیارت سے اغوا کیا گیا تھا. واقعے کے بعد علاقے میں خوف و ہراس پھیل گیا اور لیویز فورس نے جائے وقوعہ پر پہنچ کر لاش کو اپنی تحویل میں لے لیا۔
لاش کو ضروری کارروائی کے لیے اسپتال منتقل کر دیا گیا ہے، جبکہ ملزمان کی تلاش کے لیے علاقے میں سرچ آپریشن جاری ہے۔ واقعے کی مزید تفتیش کی جا رہی ہے۔
وزیر اعلیٰ بلوچستان میر سرفراز بگٹی نے زیارت کے اسٹنٹ کمشنر محمد افضل اور ان کے بیٹے کو شہید کرنے کے المناک واقعے کی شدید الفاظ میں مذمت کی ہے۔ انہوں نے کہا کہ اس بزدلانہ اور سفاکانہ کارروائی کی جتنی بھی مذمت کی جائے کم ہے۔
وزیر اعلیٰ نے کہا کہ شہید اسٹنٹ کمشنر محمد افضل ایک فرض شناس، محنتی اور قابل افسر تھے جنہوں نے اپنی ذمہ داریاں ایمانداری اور دیانت کے ساتھ نبھائیں۔ انہوں نے مزید کہا کہ شہید محمد افضل نے فرض کی ادائیگی کے دوران اپنی جان کا نذرانہ پیش کیا اور وہ ہمیشہ عوام کے دلوں میں زندہ رہیں گے۔
وزیر اعلیٰ بلوچستان نے شہید اسٹنٹ کمشنر محمد افضل اور ان کے بیٹے کی قربانی کو خراج عقیدت پیش کرتے ہوئے کہا کہ ان کے خون کو رائیگاں نہیں جانے دیا جائے گا۔ انہوں نے واضح کیا کہ معصوم جانوں کے قاتل اور امن کے دشمن اپنے انجام سے ہرگز نہیں بچ سکیں گے۔
انہوں نے شہداء کے لواحقین سے دلی ہمدردی اور تعزیت کا اظہار کرتے ہوئے کہا کہ صوبائی حکومت دکھ کی اس گھڑی میں ان کے ساتھ کھڑی ہے۔ وزیر اعلیٰ نے کہا کہ شہداء کی قربانیاں بلوچستان میں قیام امن اور استحکام کے سفر میں مشعل راہ ہیں۔