امریکا اور بھارت کے درمیان 10 سالہ دفاعی فریم ورک معاہدہ طے پا گیا ہے جو دونوں ممالک کے درمیان عسکری تعاون، تکنیکی اشتراک اور معلومات کے تبادلے کو مضبوط بنائے گا۔
امریکی وزیر دفاع پیٹ ہیگسیتھ نے اپنے بھارتی ہم منصب راج ناتھ سنگھ سے ملاقات کے بعد سوشل میڈیا پلیٹ فارم ایکس پر بیان میں کہا کہ یہ معاہدہ علاقائی استحکام، دفاعی ڈیٹرنس اور مشترکہ سلامتی کے لیے سنگِ میل ثابت ہوگا۔
معاہدے پر دستخط کوالالمپور میں ہونے والی آسیان ڈیفنس منسٹرز میٹنگ-پلس کے موقع پر ہوئے۔ پیٹ ہیگسیتھ نے کہا کہ امریکا اور بھارت کے دفاعی تعلقات پہلے سے کہیں زیادہ مضبوط ہیں اور یہ شراکت داری دنیا کی سب سے اہم دفاعی شراکت داریوں میں سے ایک ہے۔
انہوں نے بتایا کہ اس معاہدے کے تحت دونوں ممالک کے درمیان دفاعی ہم آہنگی، تکنیکی تعاون، انٹیلیجنس شیئرنگ اور تربیتی پروگراموں میں اضافہ کیا جائے گا تاکہ خطے میں سلامتی اور توازن برقرار رکھا جا سکے۔امریکی وزیر دفاع نے اس معاہدے کو تاریخی قرار دیتے ہوئے کہا کہ یہ دونوں افواج کے درمیان مستقبل میں گہرے اور بامعنی تعاون کی راہ ہموار کرے گا۔
یاد رہے کہ حالیہ مہینوں میں امریکا اور بھارت کے تعلقات میں تجارتی کشیدگی دیکھی گئی تھی تاہم دفاعی معاہدے پر دستخط دونوں ممالک کے درمیان اسٹریٹجک تعلقات میں ایک نئے دور کے آغاز کی علامت سمجھے جا رہے ہیں۔