میٹا کی جانب سے دنیا کے مقبول ترین سوشل میڈیا پلیٹ فارم فیس بک میں ایک ایسے نئے فیچر کی آزمائش کی جا رہی ہے جو اب تک اس کا حصہ نہیں تھا۔ اس فیچر کے تحت صارفین اب اپنی فیس بک پوسٹ کا 'ویو کاؤنٹ' (دیکھے جانے کی تعداد) دیکھ سکیں گے۔
ایک رپورٹ کے مطابق، فیس بک اس ویو کاؤنٹ کو مین پوسٹ ڈسپلے میں دکھائے گا، تاہم یہ معلومات صرف اسی صارف کو نظر آئیں گی جس نے مواد پوسٹ کیا ہوگا، تاکہ وہ اپنی پوسٹس کی پرفارمنس کا بہتر اندازہ لگا سکے۔
میٹا اب لائیکس کے بجائے ویو کاؤنٹس پر زیادہ توجہ مرکوز کر رہا ہے کیونکہ کمپنی کے خیال میں صرف لائیکس کسی پوسٹ کی مقبولیت کا بہترین پیمانہ نہیں ہیں۔ اس فیچر کی مدد سے صارفین جان سکیں گے کہ لوگ کس طرح کا مواد زیادہ دیکھنا پسند کرتے ہیں۔
واضح رہے کہ فیس بک اور انسٹاگرام کا الگورتھم اب صارفین کو ان کی دلچسپی کے مطابق ایسی پوسٹس بھی دکھاتا ہے جن کے اکاؤنٹس کو وہ فالو نہیں کر رہے ہوتے۔ فی الحال اس فیچر کی آزمائش محدود صارفین پر کی جا رہی ہے اور اسے تمام صارفین کے لیے متعارف کرانے کی حتمی تاریخ سامنے نہیں آئی ہے۔