آج کل پاکستان میں کرکٹ کی سب سے بڑی لیگ پی ایس ایل جوش و خروش کے ساتھ جاری ہے، تاہم سوشل میڈیا پر بھی خوب رونق لگی ہے۔ صارفین کرکٹرز کی ایک ایک حرکت اور انداز کی خبر رکھے ہوئے ہیں۔
گزشتہ روز پاکستان سپر لیگ کے چھٹے سیزن میں لاہور قلندرز اور کوئٹہ گلیڈی ایٹرز کا میچ ہوا جس میں لاہور فاتح بنا جس میں مرکزی کردار پروفیسر محمد حفیظ کا تھا۔
تاہم میچ کے اختتام پر دیکھا گیا کہ سرفراز محمد حفیظ کو ہاتھ سے کچھ اشارہ کر رہے ہیں، کچھ صارفین نے یہ خیال ظاہر کیا کہ حفیظ سرفراز احمد سے ہاتھ ملانے بڑھے تو سرفراز نے مصافحہ کرنے کے بجائے انہیں راستہ دکھایا کہ جائیں آپ۔
تاہم بعض اوقات جو دکھ رہا ہوتا ہے، حقیقت اس سے قدرِ مختلف ہوتی ہے جبکہ یہاں بھی کچھ ایسا ہی ہوا۔
ہوا کچھ یوں کہ کوئٹہ گلیڈی ایٹرز کی ٹیم کے کپتان سرفراز احمد نے دھواں دار بیٹنگ کر کے لاہور کو فتح دلوانے والے محمد حفیظ سے ساری رنجشیں بُھلا دیں اور میچ کے اختتام پر انہیں ٹیموں کو لِیڈ کرنے کے لیے راستہ دیا جس نے شائقین کو بہت متاثر کیا۔
سرفراز احمد کی جانب سے حفیظ کو ٹیمیں لیڈ کرنے کے لئے راستہ دیے جانے کے اقدام پر سوشل میڈیا صارفین بھی سابق کپتان کے اس اقدام پر خوش ہیں اور انہیں داد دے رہے ہیں۔
جبکہ وہ صارفین جنہوں نے اس معاملے کو منفی دکھایا، انہیں احتیاط برتنی چاہیے کیونکہ سرفراز نے حفیظ سے ہاتھ ملانے سے انکار نہیں کیا۔
یاد رہے کہ ٹوئٹر پر گزشتہ دنوں حفیظ اور سرفراز کی لفظی جنگ ہوئی تھی جس کے بعد سرفراز احمد نے یہ کہہ کر معاملہ کو رفع دفع کیا کہ حفیظ بڑے ہیں اور وہ ان کا احترام کرتے ہیں۔