پاک آسٹریلیا ٹیسٹ سیریز کو پاکستانی عوام نے لمحہ لمحہ انجوائے کیا اور میچز میں ہونے والی ہر چھوٹی بڑی خبر دنوں سوشل میڈیا پر چھائی رہی۔ ایسے میں کیمرہ مین کی نظر اسٹیڈیم میں موجود ایسے غریب باپ بیٹے پر بھی پڑی جنھوں نے ہاتھ میں دو پلے کارڈز اٹھا رکھے تھے۔ باپ کے ہاتھ میں موجود پلے کارڈ پر پاکستان کے دو مایہ ناز کھلاڑیوں شاہد آفریدی اور محمد رضوان کو مخاطب کرکے ان سے بیٹے کے آپریشن لے لئے مدد کی اپیل کی گئی تھی۔ دوسری جانب ساتھ کھڑے بچے کے پلے کارڈ پر کیمرہ مین کو مخاطب کرکے ان پر کیمرہ فوکس رکھنے کی درخواست کی گئی تھی۔
سوشل میڈیا صارف کا شکریہ
باپ بیٹے کی بے بسی اور لاچاری جیسے ہی کیمرے کی آنکھ میں آئی سوشل میڈیا صارفین نے تیزی سے کلپ بنا کر شئیر کرنا شروع کردیا جس کے بعد کھلاڑی رومان رئیس نے اپنی رومان رئیس فاؤنڈیشن کی ٹیم کو بچے کی مدد کی تلقین کی جبکہ احتشام الحق نامی صارف نے بچے اور اس کے والد کی تصویر ٹوئٹر پر شئیر کرتے ہوئے شاہد آفریدی کو بھی ٹیگ کیا۔ تھوڑی دیر بعد ہی لالہ نے احتشام کی پوسٹ کو ری ٹوئٹ کرتے ہوئے لکھا کہ "میری توجہ اس جانب مبذول کروانے کا شکریہ۔ شاہد آفریدی فاونڈیشن کی ٹیم بچے تک پہنچ گئی ہے اور اس کو علاج فراہم کرنے کی ہر ممکن کوشش کی جارہی ہے"
لالہ ایک بار پھر چھا گئے
شاہد آفریدی کا یہ اقدام سوشل میڈیا صارفین کو خوب پسند آیا اور انھوں نے لالہ کو ایک بار پھر اپنا ہیرو قرار دے دیا ہے۔