معروف گلوکار عبداللہ قریشی نے اسلام کی خاطر موسیقی کو چھوڑنے کا اعلان کرتے ہوئے مستقبل میں کسی طرح کے میوزک کنسرٹ اور اشتہارات نہ کرنے کا اعلان کردیا۔
عبداللہ قریشی نے اپنے سوشل میڈیا پیغام میں کہا کہ میں نے یہ فیصلہ مذہبی وجوہات کی بناء پر لیا ہے، کافی عرصہ سے خاموشی کی وجہ یہ تھی کہ میں میوزِک انڈسٹری کو خیرباد کہنے کا اعلان کرنے کے لیے کچھ وقت لینا چاہتا تھا کیونکہ میں نے میوزِک کو بطور پیشہ جاری نہ رکھنے کا فیصلہ کیا ہے۔
اپنے انسٹاگرام پیغام میں انہوں نے لکھا کہ میوزِک انڈسٹری میں بہت اچھا وقت گزرا، ہزاروں لوگوں نے مجھے سراہا اور محبت دی، کچھ بہت اچھے دوست بنائے، ایسے لوگوں کے ساتھ کام کرنے کا موقع ملا جوکہ میرے لیے مثال تھے اور میں نے بہت کچھ سیکھا اور وہ سب کیا جو کرنا مجھے اچھا لگتا تھا۔
ان کا کہنا تھا کہ میرے نزدیک زندگی کا اصل مقصد اس سے کہیں بڑھ کر ہے۔ اپنی اگلی زندگی سنوارنے کے لیے ہم سب کے پاس اس دنیا میں بہت کم وقت ہے۔ میں اپنے فیصلے سے مطمئن ہوں اور بہتری کی راہ پر گامزن ہوتے ہوئے سچ کھوج رہا ہوں۔
عبداللہ قریشی نے یوٹیوب سے پاکستانی میوزک انڈسٹری میں اپنی پہچان بنائی تھی جبکہ وہ رواں سال دوبارہ ریکارڈ شدہ قومی ترانے کا بھی حصّہ تھے جو 14 اگست 2022ء کو ریلیز ہوا۔