پاکستان فلم انڈسٹری نے بے شمار سپر اسٹار پیدا کئے ہیں جنہوں نے اپنی فنکاری سے مداحوں سے بھرپور داد حاصل کی اور ان میں سے کئی ستارے آج بھی فن کے افق پر جگمگا رہے ہیں جن میں سے ایک نام ندیم بھی ہے۔
ندیم کے نام سے شہرت پانے والے مرزا نذیر بیگ نے 1967ء میں اپنے کیرئیر کے آغاز کے بعد دوسو سے زیادہ فلموں میں کام کیا۔
مرزا نذیر بیگ عرف ندیم گلوکار بننے کیلئے فلم انڈسٹری میں آئے لیکن گلوکار تو نہ بن سکے تاہم فلم انڈسٹری کے بہترین اداکار بننے میں کامیاب ہوگئے۔ انہوں نے فلم ’’چکوری‘‘ سے کیریئر کا آغاز کیا یہاں سے ان کی کامیاب فنی زندگی کا سلسلہ شروع ہوگیا۔
ندیم نے اپنے طویل فلمی کیریئر کے دوران دو سو سے زائد فلموں میں کام کیا اور کئی طرح کے کردار کئے۔ 1974ء میں ریلیز ہونے والی فلم ’’آئینہ‘‘ ندیم کے کیریئر کی کامیاب ترین فلم تھی جس نے کراچی سرکٹ میں چار سو ایک ہفتے نمائش کے ساتھ ریکارڈ قائم کیا۔
ان کی لازوال اور سپرہٹ فلموں کی فہرست میں ’’اناڑی، پہچان، لاجواب اور قربانی، دہلیز، سہرے کے پھول، جب جب پھول کھلے، زندگی اور بھول سمیت دیگر یادگار فلمیں شامل ہیں۔
ندیم نے بطور بہترین اداکار 19 نگار ایوارڈ حاصل کئے، 3 قومی فلم ایوارڈ حاصل کئے، 19 گریجویٹ ایوارڈ حاصل کئے، بطور بہترین اداکار 10 بولان ایوارڈ حاصل کئے، 5 پرائیڈ آف پرفارمنس ایوارڈ حاصل کئے، 11 لائف ٹائم اچیومنٹ ایوارڈ حاصل کئے۔
ندیم نے 1967ء میں فرزانہ احتشام نامی خاتون سے شادی کی، ان کے دو بیٹے ہیں اور 80 سے زائد بہاریں دیکھنے والے سپر اسٹار ندیم کے لازوال کردار آج بھی فلم بینوں کے ذہنوں میں نقش ہیں۔
اداکار جاوید شیخ نے دو شادیاں کیں، ایک اہلیہ زینت منگی سے ان کے دو بچے اداکارہ مومل شیخ اور شہزاد شیخ ہیں۔ ایک شادی سلمیٰ آغا کے ساتھ ہوئی تھی اور بدقسمتی سے دونوں طلاق پر ختم ہوئیں۔
اداکار وحید مراد کے والدین کراچی کے میمن صنعتکار ابراھیم میکر کی بیٹی سلمیٰ کو پسند کرتے تھے چنانچہ والدین کی مرضی سے وحید مراد کی شادی جمعرات 17 ستمبر 1964ء کو منعقد ہوئی۔ شادی کی تقریب میں گلوکاری کے لیے کوششیں کرنے والے نذیر بیگ یعنی ندیم نے سنگیت پیش کیا۔
اپنی جذباتی اداکاری سے اَنمٹ نقوش چھوڑنے والے اداکار محمد علی نے تقریباً 3 سو کے قریب فلموں میں کام کیا اور فلموں میں ان کی ہیروئن کا کردار ادا کرنے والی اداکارہ زیبا ہی حقیقی زندگی میں بھی ان کی ہیروئن بن کر آئیں اور محمد علی کے مرتے دم تک ساتھ رہیں۔
بھارتی اداکار امیتابھ بچن سے مشابہت رکھنے والے اظہار قاضی بھی پاکستان کے نامور اداکار تھے، انہوں نے کراچی کی خاتون سے شادی کی جن سے چار بیٹیاں اور ایک بیٹا ہے۔ اظہار قاضی دسمبر 2007ء میں وفات پاگئے تھے۔