پاک فوج کے سربراہ جنرل سید عاصم منیر نے پاکستان کے عوام اور افواج کے درمیان دراڑ ڈالنے والوں کو پیغام دیا ہے کہ ہماری امن کی کوششوں کو کسی صورت کمزوری نہ سمجھا جائے۔
پاکستان ملٹری اکیڈمی کاکول میں 147ویں پاسنگ آؤٹ پریڈ سے خطاب کرتے ہوئے آرمی چیف جنرل سید عاصم منیر فوج عظیم قائد کے نظریے پر عمل پیرا ہے جس میں ذات، رنگ، نسل، جنس یا علاقائی تفریق نہیں ہے۔
آرمی چیف کا کہنا تھا کہ دشمن ریاستی اور سماجی ہم آہنگی کو متاثر کرنا چاہتا ہے اور اس مقصد کیلئے عوام اور فوج کے درمیان دراڑ ڈالنے کی سازشوں میں سرگرم ہے لیکن یاد رکھیں کہ پاک فوج اپنے فرض کو نبھانے کے لیے ہمہ وقت تیار ہے۔
امن کے لیے ہماری کوششوں کو کسی صورت کمزوری نہ سمجھا جائے، ہم اپنے مادر وطن کے دفاع کے لیے کسی بھی قربانی سے دریغ نہیں کریں گے۔
افواج پاکستان کے غیور اور سربکف سپاہی دشمن کی تعداد یا وسائل سے مرعوب نہیں ہوتے، دہشت گردی کی جنگ میں عوام اور ریاست کا کلیدی کردار ہے۔ ہمارے لیے عوام کی حفاظت اور سلامتی سے زیادہ مقدس کچھ نہیں، کوئی فرض مادر وطن کی حفاظت سے زیادہ اہم نہیں۔