قبر کے بعد چلتے ٹرک سے بکرے چوری کرنے کے حوالے سے بھی بھارت کا پاکستان کیخلاف جھوٹا پروپیگنڈا بری طرح ناکام ہوگیا۔
سوشل میڈیا پر چلتے ٹرک سے بکرے چرانے کی وائرل ویڈیو کے حوالے سے بھارتی میڈیا نے دعویٰ کیا تھا کہ یہ کراچی کی سپر ہائی وے ہے۔
بھارتیوں کی جانب سے ویڈیو میں پاکستان پر یہ طنز کیا گیا کہ یہاں لوگ بھوک اور افلاس کی وجہ سے چوری کے نت نئے طریقے ڈھونڈ رہے ہیں۔
پاکستان کے میڈیا نے گوگل ریوریس امیج ودیگر ٹولزکی مدد سے ویڈیو کا جائزہ لیا تو یہ واضح ہوگیا کہ یہ سڑک پاکستان کی نہیں بلکہ بھارت کی ہی ہے۔
ویڈیو میں دیکھا جاسکتا ہے کہ ہائی وے پر لگے بورڈ پر انگریزی میں اورنگ آباد لکھا ہے جبکہ ٹرک کے پیچھے چلنے والی گاڑی کی نمبر پلیٹ پر مہاراشٹرا کا نمبر درج ہے۔
اس سے پہلے سوشل میڈیا پر تالہ لگی ایک قبر کے حوالے سے بھی پوسٹ پر پاکستان کیخلاف ہرزہ سرائیاں کی جارہی تھیں تاہم پاکستانی میڈیا نے اس قبر کے حوالے سے بھی حقیقت بے نقاب کردی تھی۔