دنیا بھر میں دفاتر میں کام کرنے والی خواتین جب ماں بننے کے عمل سے گزرتی ہیں انھیں چھٹیوں کے علاوہ مختلف سہولیات دی جاتی ہیں۔ تاکہ وہ اس مرحلے سے ذہنی سکون سے گزر سکیں۔ البتہ ایک چینی کمپنی میں ملازمت کرنے والی 3 خواتین اس وقت الجھن کاشکار ہوگئیں جب وہ زچگی سے پہلے چھٹی کی درخواست دینے گئیں۔
چینی میڈیا کے مطابق کمپنی کو اچانک 3 خواتین کا چھٹی کی درخواست دینے کا عمل بالکل پسند نہیں آیا اور نجی کمپنی کے سینئیر ایگزیکٹیوز نے خواتین عملے سے میٹنگ کے دوران کہا کہ ادارہ اسٹاف کی کمی کا شکار ہے۔ ایسے وقت میں خواتین کو ایک ساتھ چھٹی مانگ کر ادارے پر دباؤ نہیں بڑھانا چاہیے بلکہ الگ وقتوں میں حاملہ ہونا چاہیے۔
سوشل میڈیا پر کمپنی کے اس عمل کو تنقید کا نشانہ بنایا جارہا ہے اور خواتین کو حمل کے لئے ادارے کی پالیسیوں پر عمل کرنے کے لئے مجبور کرنے کو غیر انسانی قرار دیا جارہا ہے۔