بھارتی فلم انڈسٹری کے سینئر اداکار دھرمیندر ایک بار پھر مداحوں کی دعاؤں کے محتاج ہو گئے ہیں۔ اطلاعات کے مطابق 89 سالہ لیجنڈری اسٹار کو ممبئی کے بریچ کینڈی اسپتال میں طبی خرابی کے باعث داخل کیا گیا ہے، جہاں ذرائع کے مطابق وہ اس وقت وینٹی لیٹر پر ہیں۔
بھارتی میڈیا نے دعویٰ کیا ہے کہ دھرمیندر کئی دنوں سے صحت کے مسائل میں مبتلا تھے، لیکن آج صبح اچانک ان کی حالت بگڑنے پر انہیں انتہائی نگہداشت کے وارڈ (آئی سی یو) منتقل کرنا پڑا۔ اسپتال کے باہر ان کے اہلِ خانہ کی آمدورفت میں اضافہ دیکھنے میں آ رہا ہے، جو صورتحال کی سنگینی کو ظاہر کرتا ہے۔
تاحال دھرمیندر کے قریبی حلقوں یا اسپتال انتظامیہ کی جانب سے کوئی سرکاری بیان جاری نہیں کیا گیا، جس کے باعث مداح تشویش میں مبتلا ہیں۔ کچھ رپورٹس میں کہا جا رہا ہے کہ گزشتہ ہفتے بھی انہیں سانس لینے میں دشواری کے باعث اسپتال منتقل کیا گیا تھا، جب کہ رواں سال اپریل میں ان کی آنکھ کی سرجری بھی ہوئی تھی۔
دھرمیندر بھارتی سنیما کے ان چند اداکاروں میں سے ہیں جنہوں نے چھ دہائیوں تک فلمی دنیا پر راج کیا۔ ان کی زندگی ہمیشہ عوام کے سامنے ایک باوقار اور سادہ انداز میں گزری، مگر عمر کے اس حصے میں ان کی بگڑتی ہوئی صحت مداحوں کے لیے گہری تشویش کا باعث بن چکی ہے۔ سب کی نظریں اب اسپتال سے آنے والی کسی تسلی بخش خبر پر مرکوز ہیں۔