پاکستان تحریکِ انصاف کے رہنما بیرسٹر گوہر علی خان نے کہا ہے کہ حکومت منظم انداز میں پی ٹی آئی کو دیوار سے لگانے اور جماعت پر پابندی کی راہ ہموار کرنے کی کوشش کر رہی ہے، تاہم ایسا کوئی بھی اقدام سیاسی عدم استحکام میں مزید اضافہ کرے گا۔
میڈیا سے غیر رسمی گفتگو میں بیرسٹر گوہر کا کہنا تھا کہ کل پنجاب اسمبلی میں ایک قرار داد منظور کی گئی جو اس بات کی نشاندہی کرتی ہے کہ اتنی بڑی سیاسی قوت کو محدود کرنے کی کوششیں جاری ہیں۔ انہوں نے کہا کہ اس طرح کے سخت اور انتقامی اقدامات نہ صرف جمہوری اصولوں کی خلاف ورزی ہیں بلکہ ملک میں سیاسی ماحول کو مزید خراب کر رہے ہیں۔
پی ٹی آئی رہنما نے بانی تحریکِ انصاف سے ملاقات کرنے والے کارکنان اور رہنماؤں پر واٹر کینن کے استعمال پر بھی شدید تنقید کی۔ ان کے مطابق ایک جماعت کے قائد سے ملاقات کرنے والوں پر پانی کی توپیں چلانا افسوسناک اور غیر جمہوری طرزِ عمل ہے۔
بیرسٹر گوہر نے واضح تنبیہ کی کہ حالات تیزی سے حکومت کے کنٹرول سے باہر ہوتے جارہے ہیں۔ ان کا کہنا تھا کہ اگر ہمیں سیاسی طور پر مائنس کرنے کی کوشش کی گئی تو پھر یہ لوگ بھی اپنی جگہ برقرار نہیں رہ سکیں گے۔ انہوں نے زور دیا کہ حکومت کو چاہیے کہ سیاسی انتقام کے بجائے مذاکرات اور سیاسی استحکام کی راہ اپنائے۔
پی ٹی آئی رہنما کے اس بیان نے ملکی سیاسی فضا میں ایک نئی بحث کو جنم دے دیا ہے، جبکہ پارٹی کی جانب سے حکومت کے اقدامات کو مسلسل غیر آئینی قرار دیا جارہا ہے۔