وفاقی وزیر پیٹرولیم علی پرویز ملک نے کویت کے سرکاری دورے کے دوران اعلیٰ کویتی حکام اور سرمایہ کار اداروں سے اہم ملاقاتیں کیں، جن میں پاکستان میں سرمایہ کاری بڑھانے پر تفصیلی تبادلہ خیال کیا گیا۔
وفاقی وزیر علی پرویز ملک نے کویت کے وزیر خزانہ اور چیئرمین کویت انویسٹمنٹ اتھارٹی ڈاکٹر صبیح المخیزیم سے ملاقات کی۔ اس موقع پر ڈاکٹر صبیح المخیزیم نے پاکستان میں کویت کی سرمایہ کاری مزید بڑھانے میں گہری دلچسپی کا اظہار کیا۔ کویتی وزیر خزانہ کا کہنا تھا کہ کویت انویسٹمنٹ اتھارٹی پاکستان میں نئی سرمایہ کاری کے لیے مکمل طور پر تیار ہے۔
ملاقات میں توانائی، تجارت اور سرمایہ کاری کے شعبوں میں دوطرفہ تعاون بڑھانے پر اتفاق کیا گیا۔ وفاقی وزیر علی پرویز ملک نے کہا کہ حکومت پاکستان غیر ملکی سرمایہ کاروں کو مکمل سہولیات فراہم کر رہی ہے اور سرمایہ کاری کے لیے سازگار ماحول یقینی بنایا جا رہا ہے۔
وفاقی وزیر نے میزان بینک پاکستان کے چیئرمین ریاض الادریسی سے بھی ملاقات کی۔ علی پرویز ملک نے میزان بینک کی کارکردگی کو پاکستان میں کامیاب غیر ملکی سرمایہ کاری کی بہترین مثال قرار دیا۔
بعد ازاں، وفاقی وزیر علی پرویز ملک نے کویت فنڈ برائے اقتصادی ترقی کے ڈائریکٹر جنرل ولید شملان احمد سے ملاقات کی، جس میں پاکستان کے سماجی و اقتصادی ترقی کے منصوبوں کے لیے فنڈنگ بڑھانے پر تبادلہ خیال کیا گیا۔
وفاقی وزیر نے کویت انویسٹمنٹ اتھارٹی کے ڈپٹی منیجنگ ڈائریکٹر سے بھی ملاقات کی، جس میں پاکستان اور کویت کے درمیان ادارہ جاتی تعاون مضبوط بنانے اور سرمایہ کاری کے نئے مواقع تلاش کرنے پر اتفاق کیا گیا۔
اپنے دورے کے دوران علی پرویز ملک نے کویت میں مقیم پاکستانی بزنس کمیونٹی کے رہنماؤں سے بھی ملاقات کی۔ اس موقع پر وفاقی وزیر کا کہنا تھا کہ اوورسیز پاکستانی ملکی معیشت کے لیے قیمتی اثاثہ ہیں اور حکومت انہیں ہر ممکن سہولت فراہم کرے گی۔
دورے کے دوران پاکستان اور کویت کے درمیان دوطرفہ تعلقات اور اسٹریٹجک شراکت داری کو مزید مضبوط بنانے کے عزم کا اعادہ کیا گیا۔ گلف پیٹرولیم کی جانب سے وفد کے اعزاز میں عشائیہ بھی دیا گیا۔