وزیراعظم محمد شہباز شریف سے سنگاپور کے وزیر برائے امور خارجہ ڈاکٹر ویوین بالاکرشنن نے اسلام آباد میں ملاقات کی جس میں پاکستان اور سنگاپور کے درمیان دوطرفہ تعلقات، تجارت، سرمایہ کاری اور مختلف شعبوں میں تعاون کے فروغ پر تبادلہ خیال کیا گیا۔
ملاقات کے دوران وزیراعظم شہباز شریف نے سنگاپور کے ساتھ دیرینہ اور دوستانہ تعلقات کو مزید مستحکم بنانے کے پاکستان کے عزم کا اعادہ کیا۔ انہوں نے کہا کہ رواں سال دونوں ممالک سفارتی تعلقات کے قیام کی 60ویں سالگرہ منا رہے ہیں جو دونوں ملکوں کے درمیان مضبوط تعلقات کا مظہر ہے۔
وزیراعظم نے سنگاپور کی اقتصادی تبدیلی، جدت اور ترقی کے شعبوں میں نمایاں کامیابیوں کو سراہتے ہوئے کہا کہ پاکستان سنگاپور کے ساتھ دوطرفہ اور آسیان (ASEAN) سمیت کثیرالجہتی پلیٹ فارمز پر شراکت داری کو خصوصی اہمیت دیتا ہے۔
ملاقات میں دونوں فریقین نے دوطرفہ تجارت اور سرمایہ کاری میں اضافے کے امکانات کا جائزہ لیا جبکہ ڈیجیٹل معیشت، فن ٹیک، انفراسٹرکچر کی ترقی، لاجسٹکس، چھوٹے اور درمیانے درجے کے کاروبار اور خدمات کے شعبے میں تعاون بڑھانے پر بھی گفتگو کی۔
دونوں رہنماؤں نے باہمی مفاد پر مبنی اقتصادی تعاون کے نئے مواقع تلاش کرنے اور عوامی سطح پر روابط کو مزید فروغ دینے کی اہمیت پر زور دیا۔
ملاقات میں علاقائی اور عالمی صورتحال پر بھی تبادلہ خیال کیا گیا جبکہ دونوں رہنماؤں نے دوطرفہ اور کثیرالجہتی فورمز پر مسلسل تعاون جاری رکھنے کے عزم کا اعادہ کیا۔