وزیراعلیٰ پنجاب محمد شہبازشریف سے آج یہاں ترکی کے سرمایہ کاروں کے وفدنے ملاقات کی-ترک سرمایہ کارگروپ نے پنجاب کے ہاؤسنگ سیکٹر میں سرمایہ کاری کرنے میں گہری دلچسپی کا اظہارکیا ہے- وزیر اعلی محمد شہباز شریف نے وفد سے گفتگو کرتے ہوئے کہا ہے پاکستان اور ترکی کے عوام یکجان دوقالب ہیں۔پنجاب میں ملکی و غیر ملکی سرمایہ کاری کیلئے سازگار ماحول فراہم کیا گیاہے ۔
انہوں نے کہا کہ موجودہ حکومت کی ٹھوس معاشی پالیسیوں کے باعث سرمایہ کاروں کا
اعتماد بحال ہوا ہے اورسی پیک نے بھی غیر ملکی سرمایہ کاری کی راہ ہموار کی ہے
۔پنجاب میں مختلف شعبوں میں سرمایہ کاری کے وسیع مواقع موجود ہیں -سرمایہ کار ان
مواقع سے فائدہ اٹھائیں ۔سربراہ ترک وفد احمت البراک نے کہا کہ ہم پنجاب کے ہاؤسنگ
سیکٹر میں سرمایہ کاری کے خواہاں ہیں ۔ترکی کے وفد کی قیادت البراک گروپ آف کمپنیز
کے چیئرمین احمت البراک کر رہے تھے- صوبائی وزیر پلاننگ اینڈ ڈویلپمنٹ و ہاؤسنگ ملک
ندیم کامران،ایڈیشنل چیف سیکرٹری،سینئرممبر بورڈ آف ریونیو،چیف ایگزیکٹو آفیسر اربن
یونٹ،سیکرٹری ہاؤسنگ اورمتعلقہ حکام بھی اس موقع پر موجود تھے ۔