'سوا ارب افراد کو خوراک، پانی کی کمی اور افلاس کا خطرہ'

13 Sep, 2017 بی بی سی اردو
اقوام متحدہ کا کہنا ہے کہ زمین کی زرخیزی میں کمی کے سبب دنیا بھر میں سوا ارب سے زیادہ افراد کو خوراک اور پانی کی کمی کا خطرہ ہے جبکہ سالانہ 24 ارب ٹن زرخیز مٹی ختم ہو رہی ہے اور 15 ارب درخت کاٹے جا رہے ہیں۔
خشک سالی
Getty Images
زمین کی زرخیزی کے ختم ہونے سے ریگستان میں اضافہ ہو رہا ہے اور یہ بات عالمی برادری کے لیے باعث تشویش ہے

اقوام متحدہ کی ایک رپورٹ میں کہا گیا ہے کہ دنیا بھر میں سوا ارب سے زیادہ افراد کو زمین کی کم ہوتی ہوئی زرخیزی کے سبب خوراک، پانی کی کمی اور افلاس کا خطرہ ہے۔

یہ بات اقوام متحدہ کے کنوینشن (یو این سی سی ڈی) نے منگل کو کہی ہے۔

یو این سی سی ڈی نے کہا ہے کہ گذشتہ 30 سالوں میں زمین کے قدرتی ذخائر کا استعمال دگنا ہو گیا جس سے کرۂ ارض کی ایک تہائی زمین کی زرخیزی شدید طور پر متاثر ہوئی۔

٭جنوبی سوڈان کے بعض علاقے قحط زدہ قرار

٭کینیا میں ’انسانوں اور جانوروں کے لیے ایک ہی خوراک‘

رپورٹ میں کہا گیا ہے کہ ہر سال 15 ارب درخت کاٹے جا رہے ہیں جبکہ 24 ارب ٹن زرخیز زمین ختم ہوتی جا رہی ہے۔

چین کے شہر اورڈوس میں منگل کو جاری ہونے والی رپورٹ میں یو این سی سی ڈی نے کہا: 'جس زمین پر ہم رہ رہے ہیں اس پر اس قدر دباؤ ڈالا جا رہا ہے کہ وہ بکھرنے کے قریب ہے اور اسے بچانے کے لیے اس کی حفاظت اور تجدید کاری ضروری ہے۔'

شمالی کینیا کا ایک قحط زدہ علاقہ
Getty Images
اقوام متحدہ کے ادارے نے متبنہ کیا ہے کہ اس سے غربت و افلاس میں اضافہ ہو گا

اقوام متحدہ کا ادارہ یو این سی سی ڈی زمین کی بہتر دیکھ بھال اور استعمال کو فروغ دیتا ہے اور یہ عالمی سطح پر زمین کے سلسلے میں واحد قانونی معاہدہ ہے۔

یو این سی سی ڈی کے نائب ايگزیکٹو سیکریٹری پردیپ مونگا نے کہا کہ جنگل کاٹنے، حد سے زیادہ چراہ گاہوں کا استعمال کرنے، سیلاب کے بار بار آنے اور خشک سالی کے سبب جب زمین کم زرخیز ہو جاتی ہے تو لوگ شہروں اور دوسرے ممالک کی جانب نقل مکانی پر مجبور ہو جاتے ہیں اور وسائل کی کمی کے سبب تصادم کے امکانات بڑھ جاتے ہیں۔ ان سب سے معیشت متاثر ہوتی ہے۔

انھوں نے کہا: 'اگر آپ زمین کی کم ہوتی ہوئی زرخیزی کو نہیں روکیں گے تو ہم ایک ایسے چکر میں پھنس جائیں گے جہاں لوگوں کو اپنے روزگار، گھربار اور کھیت کھلیان کو کھونا پڑ سکتا ہے۔'

انھوں نے مزید کہا کہ اگر زمین کی زرخیزی کم ہوتی ہے تو دنیا کو لوگوں کے کھانے کے لیے کم چیزیں دستیاب ہوں گی۔

نقل مکانی
Getty Images
وسائل کی کمی کے سبب لوگ نقل مکانی پر مجبور ہوں گے

ایک اندازے کے مطابق ابھی دنیا کی آبادی سات ارب ہے جو کہ سنہ 2050 میں نو ارب ہو جائے گی اور اس کے ساتھ مشکلات میں اضافہ ہو گا۔

خبر رساں ایجنسی روئٹرز کے مطابق پردیپ مونگا نے بتایا 'اگر ہم زمین کی کم ہوتی ہوئی زرخيزی کو روک سکیں، اپنے ریگستانوں کو سبزہ زار بنا سکیں تو ہم بہ آسانی اپنی خوراک کو محفوظ کر سکتے ہیں۔'

انھوں نے کہا کہ اس ضمن میں چھوٹی چھوٹی چیزیں بھی بہت اہمیت کی حامل ہیں۔ جیسے 'کھانا ضائع نہ ہونے دیں، زمین کی مینجمنٹ میں بہتری لائیں، کاشتکاری کے سمارٹ طریقے اپنائے جائیں اور زمین کی کم ہوتی ہوئی زرخیزی کو روکنے کے لیے قومی پالیسی وضع کریں تو اس بہت زیادہ فرق پڑے گا۔‘

سیلاب
Getty Images
زمین کی زرخیزی کو کم کرنے میں بار بار سیلاب کا آنا بھی شامل ہے

انھوں نے کہا 'ہم خشک سالی یا قحط سالی کو روک نہیں سکتے لیکن ہم ایسے منصوبے بنا سکتے ہیں تاکہ اس کے خطرناک اثرات سے محفوظ رہیں۔'

انھوں نے کہا کہ چین نے سنہ 2002 میں زمین کے ریگستان میں بدلنے کے خلاف پہلا قانون بنایا تھا اور تب سے اس نے ہزاروں ہیکٹر زمین کو منگولیا کے اندرونی حصے میں سبزہ زار بنا دیا ہے جس کے نتیجے میں مزید غذا اور نوکریاں پیدا ہوئی ہیں اور مقامی لوگوں کی زندگی بہتر ہوئی ہے۔

سوکھی زمین
Getty Images
خشک سالی کے سبب زمین کی زرخیزی میں کمی آتی ہے
 

Watch Live News

 مزید خبریں 
« مزید خبریں
Post Your Comments
Select Language: