اعلیٰ ثانوی تعلیمی بورڈ کراچی نے سندھ کے تعلیمی بورڈز کے سربراہوں پر مشتمل کمیٹی سندھ بورڈ کمیٹی آف چیئرمین کی جانب سے آخری موقع ختم ہونے والے انٹر کے امیدواروں کو امتحانات میں شرکت کیلئے مزید موقع دینے کے فیصلے کی روشنی میں رواں سال آرٹس ریگولر اور آرٹس پرائیویٹ گروپ کے ایسے امیدواروں کو خصوصی فیس کے ساتھ امتحانات میں شرکت کی اجازت دینے کا فیصلہ کیا ہے جن کے پاس انٹر کے امتحانات میں بیٹھنے کا کوئی موقع نہیں رہا ہے۔
تفصیلات کے مطابق آرٹس ریگولر اور آرٹس پرائیویٹ گروپس کے ایسے ناکام امیدوار جن
کے پاس امتحانات دینے کا آخری موقع 2008ء سے 2017ء کے درمیان ختم ہوا ہے انہیں صرف
2018ء کے سالانہ امتحانات میں بیٹھنے کیلئے ایک موقع فراہم کیا جارہا ہے، ایسے
امیدوار جو آخری موقع ختم ہونے کے بعد امتحانات میں شریک ہونا چاہتے ہیں وہ چھ ہزار
روپے فیس کے ساتھ متعلقہ سیکشن سے ضروری تصدیق کے بعد اپنے امتحانی فارم جمع
کرواسکتے ہیں، اس میں انرولمنٹ/رجسٹریشن فیس بھی شامل ہے۔انٹربورڈ نے ایسے تمام
امیدواروں کو ہدایت کی ہے امتحانی فارمز کے ساتھ پروفارما آف آئی ٹی سیکشن،
انٹرمیڈیٹ کی اوریجنل مارکس شیٹ ، جس سال آخری موقع ختم ہوا اس کے ایڈمٹ کارڈ کی
فوٹو کاپی، انرولمنٹ / رجسٹریشن کارڈ کی فوٹو کاپی، میٹرک کے سرٹیفکیٹ اور مارکس
شیٹ کی فوٹو کاپی لگانا ضروری ہے۔