بھارت میں ایک خاتون نے تمباکو کھانے سے منع کرنے پر خودکشی کرلی،جس کے بعد پولیس نے دو بچیوں کی ماں کی لاش پوسٹ مارٹم کیلئے بھیج دی۔
بھارتی میڈیا کے مطابق گزشتہ روز بھارتی شہر منچریال ڈنڈیپلی میں پیش آنے والے واقعہ میں ایک شادی شدہ خاتون گھریلو جھگڑے کے باعث خودکشی کرنے پر مجبور ہوگئی۔
بھارتی پولیس کے مطابق متوفیہ30 سالہ خاتون جیوتی کو تمباکو کھانے کی عادت تھی اسی بات پر اس کا شوہر سے بھی جھگڑا رہتا تھا۔ خاتون کے شوہر کے علاوہ اس کی خالہ بھی اسے ایسا کرنے سے منع کرتی تھی جو اس سے برداشت نہ ہوتا تھا۔
اسی بات پر گزشتہ دونوں میاں بیوی کے درمیان جھگڑا ہوا، روز روز کے جھگڑوں سے تنگ آکر جیوتی نے اپنی دو بیٹیوں کو پڑوسی کے گھر پر چھوڑا اور واپس اپنے گھر آکر گلے میں پھندا ڈال کر خودکشی کرلی۔
مذکورہ واقعے کی اطلاع ملتے ہی علاقہ پولیس نے جائے وقوعہ سے خاتون کی لاش کو تحویل میں لے کر پوسٹ مارٹم کے لئے اسپتال منتقل کردیا۔