پاکستان میں ہوشربا مہنگائی میں جہاں ایک شادی کرنا مشکل ہے وہاں آزاد کشمیر کے ایک باپ نے اپنے 6 بیٹوں کی ایک ہی دن شادی کرکے پورے علاقے میں دھوم مچادی ہے۔
آزاد کشمیر کے علاقے کوٹلی کے نواحی علاقہ سمروڑ میں انوکھی اور منفرد شادی ہوئی استاد محمد شفیع نے اپنے 6 بیٹوں کی ایک ہی دن شادی کرکے نئی مثال قائم کردی جہاں چھ سگے بھائی ایک ہی دن چھ دلہنیں لے کر آگئے۔
شہری محمد شفیع نے بتایا کہ میرے چھ بیٹے ہیں اور سب کی ارینج میرج ہوئی ہے،تمام بھائیوں کی شادی اپنے ہی خاندان میں ہوئی۔انہوں نے کہا کہ سب کی شادی ایک ساتھ کی اس لیے کہ مہنگائی کے اس دور میں الگ الگ شادی کرنا مشکل ہے۔
اس شادی میں سیاسی و سماجی شخصیات سمیت کئی ہزار افراد نے شرکت کی اور علاقے میں دھوم مچ گئی۔انوکھی شادی کی خبر میڈیا پر آنے کے بعد پورے ملک میں اس شادی کے چرچے ہورہے ہیں۔
واضح رہے کہ ملک میں ہوشربا مہنگائی کی وجہ سے عوام کیلئے دو وقت کیلئے روٹی کا حصول مشکل ہوچکا ہے اور ایسے میں شادیوں اور دیگر تقریبات پر اخراجات پورے کرنا بھی انتہائی دشوار ہوتا جارہا ہے۔
آزاد کشمیر کے محمد شفیع نے اپنے 6 بیٹوں کی شادی ایک ساتھ کرکے کفایت شعاری کا ایک منفرد پیغام دیا ہے جس کو پورے ملک میں سراہا جارہا ہے۔