ارادے جن کے پختہ ہوں نظر جن کی خدا پر ہو تلاطم خیز موجوں سے وہ گھبرایا نہیں کرتے، یہ شعر ان لوگوں پر صادق آتا ہے جو اپنے اداروں اور حوصلوں سے مشکل سے مشکل کام حالات میں بھی گھبراتے نہیں بلکہ آگے بڑھتے جاتے ہیں، ایسی کی ایک خاتون شبانہ ارشد بھی ہیں جنہوں نے اپنے عزم و ہمت اور حوصلے سے معذوری کو مجبوری بنانے کے بجائے اپنی طاقت بناکر معاشرے کیلئے مثال قائم کردی ہے۔
کراچی کی رہائشی شبانہ ارشد قوت گویائی اور سماعت سے محروم ہیں لیکن معذوری کے باوجود بہت کامیابی کے ساتھ اپنا آن لائن بزنس چلارہی ہیں۔ شبانہ گھر میں چیزیں بنا کر صارفین کو فراہم کرتی ہیں۔
شبانہ ہوم شیف کے طور پر لوگوں کو کھانا ڈلیور کرنے کا کام گزشتہ دو سالوں سے کررہی ہیں۔ بولنے اور سننے کی صلاحیت سے محرومی کے باجود انھوں نے اپنے ہنر کو بہترین طریقے سے استعمال کرکے دنیا کے لیے مثال قائم کی ہے۔
شبانہ کے شوہر بھی سننے اور بولنے کی صلاحیت سے محروم ہیں لیکن دونوں نے اپنی معذوری کے باوجود اپنا کاروبار شروع کیا اور شبانہ تقریباً تمام طرح کے کھانے بنا کر فروخت کرتی ہیں۔
جوڑے کے دو بچے ہیں اور یہ آن لائن بزنس کے ذریعے اپنے دونوں بچوں کی پرورش نہایت خوش اسلوبی سے کررہے ہیں۔ بچے بالکل نارمل ہیں اور اسکول میں پڑھتے ہیں۔
شبانہ لوگوں سے اشاروں کے ذریعے بات کرتی ہیں اور آرڈر بھی بک کرتی ہیں، ان کا ماننا ہے کہ آپ معذوری کے باوجود آگے بڑھ سکتے ہیں۔