اسلام آباد۔1اپریل (اے پی پی):اسلام آباد ہائیکورٹ کے چیف جسٹس عامرفاروق اور جسٹس طارق محمود جہانگیری پر مشتمل ڈویژن بنچ نے جہلم پنڈ دادن خان پراجیکٹ میں خورد بردسے متعلق کیس میں فواد چودھری کی ضمانت بعد از گرفتاری منظور کرتے ہوئے رہائی کا حکم دےدیا۔
گزشتہ روز درخواست ضمانت بعد ازگرفتاری کی سماعت کے دوران قیصرامام ایڈووکیٹ عدالت پیش ہوئے اور موقف اختیار کیاکہ 18 دسمبر 2023 کو وارنٹ گرفتاری جاری کیے گئے، فواد چودھری پر پانچ الزامات لگائے گئے ہیں،الزام ہے کہ فواد چودھری نے سیاسی اثر رسوخ کو پراجیکٹ میں استعمال کیا ہے،نیب پراسیکیوٹر نے کہاکہ ہمارے پاس گواہ ہے جو کہتا ہے کہ فواد چوہدری نے پچاس لاکھ روپے رشوت لی،چیف جسٹس نے کہاکہ پچاس لاکھ روپے نیب کے دائرہ اختیار میں کیسے آتا ہے؟،نیب پراسیکیوٹر نے کہا کہ کیس ابھی انکوائری سٹیج پر ہے، مزید تفصیلات حاصل کر رہے ہیں۔عدالت نے فواد چوہدری کی درخواست ضمانت منظور کر لی۔