بچوں سے جب پوچھا جائے کہ انہیں کیا بننےکا شوق ہے تو وہی یہی کہتے ہیں کہ ڈاکٹر ، ٹیچر یا پھر انجینئر۔لیکن آج کے بچوں کا شوق تبدیل ہوچکا ہے۔
مقبوضہ کشمیر سے ایک بچی سامنے آئی ہے جسے صحافت کا شوق ہے۔ مذکورہ بچی کا نام حافظہ ہے جو رپورٹنگ کا شوق رکھتی ہے اور اسے بڑے ہوکر صحافی بننے کا شوق ہے۔
بچی نے مقبوضہ کشمیر کی سڑکوں کی ابتر حالت کو ویڈیو کے ذریعے بتایا ہے جو کہ وائرل ہو رہا ہے۔
ویڈیووائرل ہونے کے بعد بھارتی میڈیا نے چھوٹی بچی کے گھر والوں سے رابطہ کیا اور بتایا کہ 5 سالہ حافظہ مقبوضہ کشمیر میں مقیم بلال احمد خان اور شائستہ ہلال کی بیٹی ہے۔
مقبوضہ کشمیر سے تعلق رکھنے والی حافظہ نے اپنے گھر کے قریبی خراب اور خستہ حال سڑک کی صورتحال کے بارے میں رپورٹنگ کی جو بارشوں اور برف باری کے باعث خراب ہوچکی ہیں۔
حافظہ نے اپنے گھر کے قریبی سڑک کا دورہ کیا اور سوشل میڈیا صارفین کو آگاہ کیا۔ بچی کی ویڈیو اس کی والدہ بنا رہی تھیں۔
ویڈیو دو منٹ پر مشتمل تھی اور حافظہ اپنی والدہ کو بتائے جا رہی تھی کہ کس طرف موبائل سے مناظر شوٹ کرنے ہیں۔