دلہا دلہن شادی میں انٹری کے لئے منفرد انداز اپناتے ہیں تاکہ لوگ ان کی شادی ہمیشہ یاد رکھیں لیکن جس شادی کی بات ہم کرنے جارہے ہیں اسے شاید ہی کوئی بھول سکے کیونکہ اس شادی میں دلہا بارات ایمبولینس پر لایا جبکہ خود وہ اسٹریچر پر تھا۔ یہ سب اس نے منفرد بننے کے لئے نہیں کیا تھا بلکہ اس کی مجبوری تھی۔
شادی سے چند دن پہلے ایکسیڈنٹ
بھارتی شہر احمد آباد سے تعلق رکھنے والے راہول کی شادی یکم مارچ کو اجتماعی شادیوں کی تقریب میں ہونی تھی لیکن افسوس کہ شادی سے صرف پانچ دن پہلے ان کا ایکسیڈنٹ ہوگیا جس سے ان کی بائیں ٹانگ میں بری طرح فریکچر ہوا۔ ڈاکٹرز نے راہول کی ٹانگ میں لوہے کی سلاخ ڈالی۔
پھیرے بھی اسٹریچر پر ہوئے
راہول کی شادی کے دن قریب تھے اور وہ اپنے پیروں پر کھڑے ہونے کے قابل نہیں تھے لیکن انھیں ہر حال میں طے شدہ دن ہی شادی کرنی تھی۔ راہول نے حوصلہ کرتے ہوئے ایمبولینس منگوائی اور دلہا بن کر اسٹریچر پر بارات لے گئے۔ چونکہ یہ ہندو طرز کی شادی تھی اس لئے پھیرے بھی اسٹریچر پر ہوئے جس کے لئے راہول کے دوستوں نے ان کی مدد کی۔
سوشل میڈیا پر ویڈیوز وائرل
راہول نے اس قدر مدد کرنے پر اپنے دوستوں کا شکریہ ادا کیا۔ اس انوکھی شادی کی تصاویر اور ویڈیوز سوشل میڈیا پر تیزی سے وائرل ہورہی ہیں