تمھاری زبان تو گز بھر لمبی ہے، ارے کتنی لمبی زبان ہے تمھاری۔۔ یہ محاورے آپ نے اپنی زندگی میں کبھی نہ کبھی تو ضرور ہی سنے ہوں گے لیکن آج ہم آپ کو ایسے شخص سے ملوا رہے ہیں جس کی زبان سچ مچ کافی لمبی ہے۔

زبان سے کہنی چھو سکتا ہے

ان کا نام پراوین ہے اور یہ بھارت کی ریاست تامل ناڈو میں رہتے ہیں۔ پراوین روبوٹ ٹیکنالوجی کے طالب علم ہیں اور حیرت انگیز طور پر وہ اپنی زبان سے اپنی آنکھیں، ناک اور کہنی تک کو چھو لیتے ہیں۔

عام لوگوں سے زیادہ لمبی زبان

یونیورسٹی آف ایڈنبرا کے ماہرین کا کہنا ہے کہ مردوں کی زبان کی لمبائی 8 اعشاریہ 5 سینٹی میٹر تک ہوتی ہے لیکن پراوین کی زبان عام لوگوں کے مقابلے میں 5 سینٹی میٹر زیادہ لمبی ہے جس کی وجہ سے انھیں دنیا میں سب سے لمبی زبان کا حامل شخص مانا جاتا ہے اور بہت جلد ان کا نام گینز بک آف ورلڈ ریکارڈ میں بھی درج ہوجائے گا۔