کراچی میں آج بادل برسنے کا سلسلہ جاری رہنے کا امکان ہے۔ محکمہ موسمیات کے مطابق شہر میں ہلکی سے درمیانی شدت کی بارش متوقع ہے تاہم دوپہر تک موجودہ بارش کا اسپیل کمزور پڑ جائے گا اور شام تک بارش برسانے والا سسٹم شہر کی حدود سے نکل جائے گا۔
محکمہ موسمیات کا کہنا ہے کہ 27 اگست سے ایک اور بارش برسانے والا سسٹم کراچی کو متاثر کرے گا جس کے باعث دوبارہ بارشوں کا سلسلہ شروع ہونے کا امکان ہے۔
شہر کا مطلع اس وقت ابرآلود ہے جبکہ سمندری ہوائیں جزوی طور پر بحال ہو چکی ہیں۔ مغربی سمت سے 15 کلو میٹر فی گھنٹہ کی رفتار سے ہوائیں چل رہی ہیں۔
موجودہ درجہ حرارت 27 ڈگری سینٹی گریڈ ریکارڈ کیا گیا ہے تاہم نمی کا تناسب 83 فیصد ہونے کی وجہ سے درجہ حرارت 31 ڈگری سینٹی گریڈ محسوس کیا جا رہا ہے۔