اسلام آباد کی مقامی عدالت میں ٹک ٹاکر سامعہ حجاب اور ملزم حسن زاہد کے درمیان ہونے والا مشروط صلح نامہ پیش کردیا گیا جس کے بعد عدالت نے ملزم کی ضمانت منظور کرلی۔
عدالتی دستاویزات کے مطابق سامعہ حجاب نے اپنے بیان میں کہا کہ حسن زاہد نے ہراسانی کی غلطی تسلیم کر کے معافی مانگ لی ہے، معاہدے میں یہ بھی درج ہے کہ ملزم نے مدعیہ کو کسی قسم کی رہائش فراہم نہیں کی۔
راضی نامے میں کہا گیا ہے کہ حسن زاہد اور ان کے اہل خانہ یا دوست احباب نہ سامعہ حجاب اور ان کے خاندان کے خلاف سوشل میڈیا پر کوئی مواد شائع کریں گے اور نہ ہی کسی قسم کی ہراسانی میں ملوث ہوں گے اور اگر دوبارہ ایسی کوئی حرکت کی گئی تو سامعہ حجاب کو قانونی چارہ جوئی کا مکمل حق حاصل ہوگا۔
مدعیہ نے عدالت کو تحریری طور پر آگاہ کیا کہ وہ ان شرائط کے تحت کیس کو مزید آگے نہیں بڑھانا چاہتیں۔ ایڈیشنل سیشن جج چوہدری عامر ضیا نے صلح نامہ پیش کیے جانے اور مدعیہ کے بیان کے بعد حسن زاہد کی 20 ہزار روپے کے مچلکوں کے عوض ضمانت منظور کرلی۔