سعودی پاکستان جوائنٹ بزنس کونسل کے چیئرمین شہزادہ منصور بن محمد آل سعود نے کہا ہے کہ پاکستان خطے میں تجارت کا دروازہ ہے اور سعودی عرب اس کے ساتھ اقتصادی تعلقات کو مزید فروغ دینے کا خواہاں ہے۔
وزیراعلیٰ سندھ سید مراد علی شاہ نے سعودی پاک جوائنٹ بزنس کونسل کے چیئرمین شہزادہ منصور بن محمد آل سعود کی قیادت میں 30 رکنی اعلیٰ سطحی وفد سے وزیراعلیٰ ہاؤس کراچی میں ملاقات کی ہے۔ اس ملاقات میں دونوں ممالک کے درمیان اقتصادی تعلقات، سرمایہ کاری اور تجارتی تعاون کو فروغ دینے پر تبادلہ خیال کیا گیا۔
ملاقات کے بعد گفتگو کرتے ہوئے شہزادہ منصور بن محمد آل سعود نے کہا کہ ’ہماری کونسل نئی نہیں، ہم دوطرفہ تجارت کرتے ہیں۔‘انہوں نے کہا کہ ’سرمایہ کاری کے حوالے سے وزیراعظم پاکستان نے سعودی عرب کا دورہ کیا اور اسی سلسلے میں ہم آج یہاں آئے ہیں۔‘شہزادہ منصور بن محمد آل سعود نے کہا کہ ’ہم مل کر کام کریں گے اور معیشت کو مضبوط کریں گے۔ ’پاکستان سیاحت کے حوالے سے بھی بہت اہم ہے۔ ہمارے ساتھ تمام شعبوں کے سرمایہ کار آئے ہیں اور وہ پاکستان میں سرمایہ کاری کریں گے۔‘کونسل کے سربراہ کا کہنا تھا کہ پاکستان نجکاری کر رہا ہے اور ہم اسے اپنے لیے ایک موقع سمجھتے ہیں۔وزیراعلی سندھ نے تقریب سے خطاب کرتے ہوئے کہا کہ پاکستان اور سعودی عرب کے درمیان حالیہ ہاہمی سٹریٹجک دفاعی معاہد نے دونوں ممالک کے درمیان تعلقات کو مزید مضبوط کیا ہے۔وزیراعلی نے کہا کہ دونوں ممالک کے درمیان گہرے ہوتے ہوئے تزویراتی تعلقات نے مضبوط معاشی شراکت داری کی بنیادیں بھی فراہم کی ہیں۔سندھ کراچی سے ٹھٹھہ کے ساحل تک کئی صدیوں سے جزیرہ نما عرب کے ساتھ تجارت کے لیے منسلک رہا ہے۔’آج جب ہم سعودی پاکستان جوائنٹ بزنس کونسل کی چھتری تلے جمع ہو رہے ہیں تو ہم نہ صرف ان تاریخی تعلقات کو مضبوط بنا رہے ہیں بلکہ ہم مشترکہ خوشحالی کے نئے دروازے کھول رہے ہیں۔‘
ترجمان وزیراعلیٰ کے مطابق وفد میں سعودی عرب کے سفیر نواف بن سعید احمد المالکی سمیت توانائی، زراعت، تعمیرات، کان کنی، لائیو اسٹاک، لاجسٹکس اور سرمایہ کاری کے شعبوں سے تعلق رکھنے والی ممتاز کاروباری شخصیات شامل تھیں۔
اجلاس میں پاکستان بزنس کونسل، اوورسیز انویسٹرز چیمبر آف کامرس اینڈ انڈسٹری اور سعودی سفارت خانے کے نمائندے بھی شریک ہوئے۔
ترجمان وزیر اعلیٰ سندھ کے مطابق وزیراعلیٰ سندھ نے کہا کہ’سندھ پاکستان کی معاشی ترقی کا گیٹ وے بننے کے لیے تیار ہے۔‘
انہوں نے بتایا کہ صوبائی حکومت نے زمینوں کے ریکارڈ کو ڈیجیٹلائز کر دیا ہے اور سرمایہ کاری کے طریقہ کار کو آسان بنایا گیا ہے۔ ان کا کہنا تھا کہ سندھ حکومت سرمایہ کار دوست پالیسیوں اور اصلاحات پر مبنی ماحول کے قیام کے لیے پرعزم ہے۔
مراد علی شاہ نے کہا کہ سندھ حکومت سعودی وژن 2030 کے اہداف سے مکمل ہم آہنگ ہے، اور دونوں ممالک کے درمیان شراکت داری خطے کے معاشی مستقبل کے لیے اہم کردار ادا کرے گی۔ انہوں نے توانائی، زراعت، انفراسٹرکچر، لاجسٹکس، ماہی گیری، لائیو اسٹاک اور سپیشل اکنامک زونز میں سرمایہ کاری کی دعوت دی۔
وزیراعلیٰ سندھ نے حیدرآبادسکھر موٹروے اور کراچی کے بلیو اور ییلو لائن ٹرانزٹ سسٹم میں بھی شراکت کے امکانات پر روشنی ڈالی۔ اجلاس میں مختلف شعبوں میں مشترکہ ورکنگ گروپس کے قیام پر اتفاق کیا گیا تاکہ تعاون کے تسلسل کو یقینی بنایا جا سکے۔