افغانستان سے متصل بارڈر امور پر مشاورت کے لیے پاکستانی وفد آج کابل جائے گا جہاں افغان حکام کے ساتھ دوطرفہ تجارت سمیت مختلف اہم امور پر تبادلہ خیال کیا جائے گا۔
ذرائع کے مطابق ملاقاتوں میں ون ڈاکومنٹ رجیم، سرحدی انتظامات، تجارتی تعاون اور نقل و حرکت کے نظام کو بہتر بنانے کے اقدامات پر غور کیا جائے گا۔
ذرائع نے واضح کیا کہ وفد کا یہ دورہ پہلے سے طے شدہ تھا اور اس کا طورخم بارڈر کی حالیہ بندش یا موجودہ کشیدگی سے کوئی تعلق نہیں۔وفد افغان حکام سے ملاقاتوں میں دوطرفہ تعاون کے فروغ، اعتماد سازی اور علاقائی سلامتی سے متعلق امور پر بھی بات کرے گا۔
ذرائع کے مطابق مذاکرات کے ایجنڈے میں جنگ بندی معاہدے پر عمل درآمد اور افغان طالبان کی جانب سے کالعدم تحریک طالبان اور دیگر دہشت گرد عناصر کے خلاف اقدامات سے متعلق معاملات بھی شامل ہیں۔
وفد کا مقصد دونوں ممالک کے درمیان اعتماد سازی اور علاقائی امن کے لیے مشترکہ حکمتِ عملی پر پیش رفت کرنا ہے۔