پاکستان کے فاسٹ بولر حارث رؤف دو میچز کی پابندی کے باعث ساؤتھ افریقا کے خلاف دوسرا انٹرنیشنل میچ بھی نہیں کھیل سکیں گے۔
انٹرنیشنل کرکٹ کونسل (آئی سی سی) کے مطابق حارث رؤف کو ایشیا کپ کے دوران پیش آنے والے واقعات پر چار ڈی میرٹ پوائنٹس ملنے کے بعد دو میچز کی پابندی کا سامنا کرنا پڑا ہے۔
حارث رؤف پہلے بھی سیریز کے ابتدائی میچ میں دستیاب نہیں تھے اور اب دوسرا میچ بھی نہیں کھیل پائیں گے۔ آئی سی سی کے مطابق ایشیا کپ کے 21 اور 29 ستمبر کو پاکستان اور بھارت کے درمیان ہونے والے میچز کے دوران مختلف کھلاڑیوں کی جانب سے ضابطۂ اخلاق کی خلاف ورزیاں رپورٹ کی گئی تھیں۔
ان ہی واقعات کے تحت بھارتی کپتان سوریہ کمار یادو کو دو ڈی میرٹ پوائنٹس جبکہ جسپریت بمرا، ایچ ڈیپ سنگھ، اور پاکستان کے صاحبزادہ فرحان کو تنبیہ جاری کی گئی ہے۔
ذرائع کے مطابق حارث رؤف پر سب سے سخت سزا اس لیے عائد کی گئی کیونکہ انہوں نے میچز کے دوران اشارے کیے جو آئی سی سی کے ضابطہ اخلاق کی سنگین خلاف ورزی قرار دی گئی۔آئی سی سی نے وضاحت کی کہ یہ تمام فیصلے ایشیا کپ کے دوران ہی طے کر لیے گئے تھے تاہم انہیں اب باضابطہ طور پر منظرِ عام پر لایا گیا ہے۔