پاکستان کرکٹ بورڈ کا کہنا ہے کہ فاسٹ بالر شاہین شاہ آفریدی نے اپنے گھٹنے کی چوٹ سے بحالی کا سلسلہ شروع کردیا ہے۔
پاکستان کرکٹ بورڈ نے بدھ کے روز بتایا کہ شاہین شاہ آفریدی اس وقت لاہور میں میڈیکل پینل کی نگرانی میں ہائی پرفارمنس سینٹر پر اپنی بحالی کر رہے ہیں تاہم پی سی بی نے یہ نہیں بتایا کہ شاہین کب تک مکمل طور پر فٹ ہوجائیں گے۔
یاد رہے کہ آسٹریلیا میں بگ بیش کے دوران ایک میچ میں شاہین فیلڈنگ کرتے ہوئے زخمی ہوگئے تھے اور بعد میں ان کو ان کی ٹیم برسبین ہیٹ نے ان کے کنٹریکٹ سے آزاد کردیا تھا اور پی سی بی نے ان کو پاکستان واپس بلا لیا کہ ہائی پرفارمنس سینٹر پر ان کی صحت یابی کا عمل جاری رکھا جائے۔
آج سے سری لنکا میں شروع ہونے والے ٹی ٹوئنٹی سیریز میں شاہین کا نام نہیں دیا گیا تھا لیکن ورلڈ کپ کے لیے جو 15 رکنی عارضی اسکواڈ کا نام آئی سی سی کو بھیجا گیا ہے اس میں شاہین شاہ آفریدی شامل ہیں۔