بلوچستان حکومت نے صوبے کی اہم شاہراہوں پر سکیورٹی کو مزید مؤثر بنانے کے لیے نئی فورس کے قیام کا فیصلہ کر لیا ہے، جس پر 25 ارب روپے لاگت آئے گی۔
ایڈیشنل چیف سیکریٹری داخلہ بلوچستان حمزہ شفقات کے مطابق نئی فورس کو آئندہ چھ ماہ کے دوران مکمل طور پر فعال کر دیا جائے گا تاکہ شاہراہوں پر امن و امان کی صورتحال کو بہتر بنایا جاسکے۔
انہوں نے بتایا کہ فورس کے مکمل قیام تک مال بردار گاڑیوں کو قافلوں کی صورت میں اپنی منزل تک پہنچانے کی تجویز زیر غور ہے، جبکہ ٹرانسپورٹرز کے تحفظ کے لیے مال بردار گاڑیوں کی انشورنس کا نظام بھی متعارف کرایا جائے گا۔
حمزہ شفقات کا کہنا تھا کہ شاہراہوں پر نذرِ آتش کی جانے والی گاڑیوں کے مالکان کو معاوضے کی ادائیگی کے عمل کو بھی تیز کیا جا رہا ہے تاکہ متاثرین کو جلد از جلد ریلیف فراہم کیا جاسکے۔