ڈبلیو ڈبلیو ایف پاکستان نے کراچی کے ساحل سے تقریباً 40 ناٹیکل میل جنوب مغرب میں نایاب اسپرم وہیل کی موجودگی ریکارڈ کی ہے جس کی لمبائی تقریباً 45 فٹ بتائی گئی ہے۔
ڈبلیو ڈبلیو ایف پاکستان کے تکنیکی مشیر محمد معظم خان کے مطابق سندھ کے ساحلی سمندر میں اسپرم وہیل کا یہ پہلا ریکارڈ شدہ مشاہدہ ہے، اس سے قبل یہ وہیل بلوچستان کے ساحل کے قریب دیکھی گئی تھی۔
انہوں نے بتایا کہ وہیل کو ڈبلیو ڈبلیو ایف کے بورڈ ممبر زاہد میکر کی سمندری مہم کے دوران دیکھا گیا، جبکہ اس کی ویڈیو میں مخصوص سانس لینے کا سوراخ، جلد کے نشانات اور نمایاں کوہان بھی ریکارڈ ہوئے۔
ڈبلیو ڈبلیو ایف کے مطابق پاکستان کے سمندری پانیوں میں وہیل اور ڈولفن کی 26 اقسام موجود ہیں۔ اسپرم وہیل خوراک کی تلاش میں 300 سے 800 میٹر گہرائی تک غوطہ لگاتی ہے، جبکہ بعض اوقات ایک سے دو کلومیٹر گہرائی تک بھی پہنچ سکتی ہے۔